Partisipa Enkontru Altu Nivel OMS Iha Nova Iorke, Ministra Elia Toka Asunto Rua

Smnewstl.com – Ministra Saúde Elia dos Reis Amaral sei partisipa iha enkontru altu nível kona ba Pandemia, Prevensaun, Preparasaun no Responde (PPP – sigla iha inglez) ne’ebé sei realiza iha Nova Iorke husi loron 22 to’o 26 fulan Setembru.

Enkontru ne’e sei ko’alia mos kona-ba Kobertura Universal Saúde, habelar atendimento pós COVID, luta kontra TBC ne’ebé konsideradu hanesan epidemia global no tenke halo atendimento urjente.

Enkontru seluk ne’ebé mak assosia iha agenda vizita ne’e mak prevensaun ba TBC ho tema: promove siénsia, finansas ho inovasaun, hodi hakotu urjentemente epidemia global TBC nian, liu-hosi asesu saúde ho forma equitativa, aposta ba prevensaun no mos kuidadu báziku sira.

Finalidade husi enkontru ne’e mak tau hanoin hamutuk hodi bele haforsa servisu no cumpre Objetivu Dezenvolvimentu Sustentável – ODS, hodi garante katak, to’o tinan 2030, koobertura saúde ba sidadaun hotu garantidu.

Eventu mundial ne’e planeia atu bele kria ordem sosial ida seguru, dinamika no soliedariedade iha kestaun prevensaun no responde sedu ba possível pandemia iha futuru.

Tuir komunikadu husi Palásiu Sinzas, iha final enkontru ne’e hamosu deklarasaun ne’ebé konsentra ba mobilizasaun politika husi nasional to’o internasional, hodi aposta ba prevensaun pademia no halo arranju ba medidas intervensaun. (SMNews)