Órgaun Konsultivu Rua Rekomenda PR Extende Estadu Emerjénsia

Smnewstl.com (Dili) — Órgaun konsultivu rua hanesan Konsellu Estadu no mós Konselu Superiór Defeza no Seguransa, rekomenda bá Prezidente Repúblika (PR) atu hato’o pedidu bá Parlamentu Nasionál (PN) hodi extende tan estadu emerjénsia bá dala-16.

Xefe Kaza Sivíl Prezidénsia Repúblika, Francisco Maria de Vasconselhos haktuir, órgaun konsultivu rua ne’e rekomenda bá Xefe Estadu, Francisco Guterres Lú-olo atu hato’o tan pedidu bá PN hodi autoriza PR extende estadu emerjénsia bá dala-16, maibé atu autoriza ou la’e ne’e kabe bá kompeténsia PN nian.

Membru konsellu konsultivu rua ne’e hato’o pedidu ne’e, relasiona ho evolusaun surtu Covid-19 ne’ebé kada loron númeru aumenta bá beibeik, inklui rejista mós variante Delta iha Timor-Leste.

“Enkontru ohin membru konsellu sira rekomenda bá Prezidente atu Prezidente hato’o pedidu bá Parlamentu Nasionál, Parlamentu atu deside autoriza ou la autoriza ne’e depende bá Parlamentu Nasionál, mais ohin lokraik ida-ne’e, prepara dokumentus atu haruka bá Parlamentu Nasionál,” dehan Xefe Kaza Sivíl, Francisco Vasconselhos, hafoin remata enkontru iha Palásiu Prezidensiál Aitarak-laran, Dili. Segunda (23/08/21).

Xefe Kaza Sivíl ne’e lakoi atu esplika kona-ba medidas ne’ebé órgaun konsultivu rua ne’e hato’o iha enkontru konsellu estadu no konsellu superiór defeza no seguransa ne’ebé lideradu husi Prezidente Repúblika.

Maibé nia dehan, medidas ezekusaun bá deklarasaun estadu emerjénsia ne’e, governu sei aprova, bainhira PN autoriza ona.

“Medidas sira-ne’e depende de Parlamentu Nasionál autoriza ona Prezidente dekreta, depois governu sei halo fali dekretu ida atu halo implementasaun oinsá, medidas ne’ebé mak sei foti, bazeia bá dezenvolvimentu ne’ebé mak iha ita-nia rain Covid-19 no mós variante Delta foun ne’ebé foin dadauk fó sai, mais ninia kontéudu ha’u labele divulga bá ita-boot sira,” nia dehan tan.

Vasconselhos informa, kondisaun saúde Prezidente Repúblika, Francisco Guterres Lú-olo nian rekoperadu ona, maibé enkontru konsellu estadu no konsellu superiór defeza no seguransa ne’e halo liu husi zoom de’it, nune’e evita kontaminasaun.

“Rekoperadu tiha ona, tanba ne’e mak ohin halo liu husi zoom, ne’e médiku sira mak rekomenda, ne’e prátika normál iha fatin hotu-hotu, evita kontaminasaun, tanba ne’e mak labele prejudika liután lori perigu bá Prezidente, mais prezidente ohin rekoperadu,” hakotuk nia.(ant)