ONU no Ajensia Tomak Sei Aliña Apoiu Tuir Programa Prioridade Governasaun PM Xanana

smnewstl.com – Organizasaun Nasoes Unidas (ONU) hamutuk ho nia ajensia tomak hanesan UNICEF, IOM, WFP, UNDP, UN Woman, ILO, UNESCO, FAO, WHO, UNFPA iha Timor-Leste sei aliña sira nia apoiu tuir programa prioridade ne’ebé IX Governu Konstitusionál define ona.

Koordenadora UN Residente iha Timor-Leste, Funmi Balogan Alexander hamutuk ho xefe ajensia sira informa kometimentu ne’e durante hasoru malu ho S.E. Sr. Primeiru-Ministru, Kay Rala Xanana Gusmão, iha salaun Gabinete Fronteira Maritima, Palasiu Governu, Dili.

Primeiru-Ministru, Xanana Gusmão agradese bele rona direita programa ne’ebé ONU no ajensia idak-idak sei hala’o no apoiu iha área oin-oin ba governu no povu Timor-Leste.

“Ohin mai husi Organizasaun Nasoes Unidas (ONU) nian, ami ko’alia kona-ba iha saida mak sira hakarak halo, no imi koñese ona katak sira halo ona buat balun maibé tamba governu foun sira husu ami atu ko’alia ba malu kona-ba iha saida mak sira bele fó apoiu nafatin mai Timor-Leste. Ami sei deskuti, agora ha’u tenke hatene lai saida mak sira halo, no ami hatete durante tinan lima ne’e ami iha tempu naton hodi ko’alia ba malu, sira hetete saida mak ami halo sei halo liu saida mak sira husu,” informa PM Xanana ba jornalista.

Iha fatin hanesan, Koordenadora UN Residente iha Timor-Leste, Funmi Balogan Alexander agradese bele hasoru direita Xefe Governu Xanana hodi reafirma sira nia programa no apoiu.

“Ohin loron, UN Timor-Leste hasoru malu ho Primeiru-Ministro hodi halo aprezentasaun kona-ba sira-nia servisu no asegura apoiu husi ONU ba implementasaun Programa Governu Konstitusional IX nian,” Funmi agradese.

Iha enkontru kuaze oras rua ne’e, Primeiru-Ministru Xanana agradese bele rona direita ONU ninia apoiu ba dezenvolvimentu nasaun hosi Koordenadora UN Residente iha Timor-Leste, Funmi Balogan Alexander, Reprezentante UNICEF, Bilal Aurang Zeb Durrani, Reprezentante Direitus Umanus ONU, Claudia Soares Gomez Diaz, Reprezentante FAO (non-resident), Rajendra Aryal, Direitór ILO Timor-Leste no Indonézia (non-resident),Michiko Miyamoto,Reprezentante IOM, Aishath Ihma Shareef, Reprezentante UNDP, Adeline Carrier, Reprezentante UNFPA, Pressia Arifin-Cabo, Reprezentante UN-Women, Amy Nishtha Satyam, Diretór WFP, Alba Cecilia Garzon Olivares, Reprezentante WHO, Dr. Vinay Bothra, Diretór no Reprezentante UNESCO (non-resident), Maki Katsuno-Hayashikawa no Koordenador UN -Volunteers, Mario de Jesus Ximenes (Smnews)