Observa Direta Sala Izolamento Lahane, PM Taur Husu Hametin Relasaun Ho Profisionál Saúde AUSMAT Austrália

smnewstl.com 18-09-2021 (Dili) – Primeiru-Ministru (PM), Taur Matan Ruak, enkoraja profisionál saúde timoroan sira, atu hametik relasaun servisu médiku espesialista Asisténsia Médiku Austrálianu (AUSMAT) hodi salva vida pasiente Covid-19 sira.

Xefe Governu, Taur Matan Ruak hato’o deklarasaun ne’e, hafoin halo observasaun bá sala izolamentu iha ospitál Lahane.

“Ha’u mós enkoraja ita-nia profisionais saúde sira timoroan sira par bele hametin relasaun ho profisionais Australianu sira liu-liu tékniku profisionais sira AUSMAT, tanba prioridade primeiru mak ita reune esforsu, rekursu par salva ita-nia pasiente sira,” dehan PM Taur, sábdu ohin iha Lahane.

Xefe Ezekutivu ne’e konsidera, servisu parseria entre profisionál saúde Timoroan ho médiku espesialista AUSMAT husi Austrália ne’e di’ak, tanba Timor-Leste foin ukun-aan tinan 20 ne’ebé sei enfrenta difikuldade barak.

Xefe Ezekutivu ne’e hatutan, liu husi servisu parseria entre Timor-Leste ho Austrália ne’e hanesan formasaun bá tékniku profisionál saúde Timoroan sira, tanba Timor-Leste foin ukun-aan tinan 20 ne’ebé sei hasoru difikuldade barak.

“Segundu mak oinsá kria parseira ida di’ak a médiu, longu prazu bá formasaun no preparasaun tékniku profisionál bá ita-nia ema sira, tanba ita nasaun 20 anos nurak demais, entaun ita sei iha difikuldades, entaun ita ultrapassa difikuldade sira-ne’e, sé ita hatene kria parserias,” afirma PM Taur.

Líder órgaun ezekutivu ne’e mós husu família pasiente sira hotu, atu fó konfiansa tomak bá médiku timoroan sira, tanba pasiente barak mak sei hakarak moris.

Entretantu, foin lalais ne’e, espesialista médiku nain tolu to’o tan ona iha Timor-Leste hodi hamutuk ho Ekipa Asisténsia Médiku Austrálianu (Sigla Inglés: AUSMAT), hodi fó asisténsia médika bá pasiente Covid-19 sira iha Timor-Leste.

Espesialista na’in tolu ne’e kompostu husi Enfeirmeira, fisioterapia no terapia okupasional ba ICU sei hamutuk ho sira nia kolega sira hodi fornese kuida krítiku no apoia ba pasiente iha fasilidade izolamentu COVID-19.(ant)