Munisípiu Ermera, Ainaru no Aileu Taxa Partisipasaun Simu Vasina Menus Husi 30%

Smnewstl.com (Dili) — Tuir relatóriu monitorizasaun ne’ebé membru ONG sira halo deskobre, munisípiu tolu hanesan Ermera, Ainaru no Aileu mak taxa partisipasaun komunidade nian atu simu vasina menus husi 30%.

Tanba ne’e, Diretór FONGTIL, Daniel Santos do Carmo hateten, ministériu saúde presiza servisu hamutuk ho líder komunitáriu sira, atu sensibiliza kampaña vasinasaun kona-ba benefísiu husi vasina, nune’e bele hasa’e taxa partisipasaun komunidade ne’ebé sei menus husi 30% hanesan munisípiu tolu ne’e.

“Rajaun ida tanba saida mak munisípiu tolu ne’e persentajen sei ki’ik, ne’e tanba munisípiu sira-ne’e jeográfikamente ne’e sira iha foho, distansia entre sentru saúde ho sira-nia hela fatin ne’e dok malu, entaun sira labele la’o husi kilómetru ida par simu vasina, satán ema idozus sira,” dehan Diretór Daniel do Carmo, iha komferénsia imprensa Segunda (09/08/21) iha FONGTIL kaikoli, Dili.

FONGTIL mós husu atu halo alterasaun fila-fali bá oráriu kampaña vasinasaun nian, nune’e kampaña vasina ne’e bele halo to’o iha suku no aldeia sira, inklui koordena ho xefe suku sira atu mobiliza sidadaun sira bá vasina.

“Tanba ne’e mak ita dehan, tenki halo fali reschedule ka oráriu vasina ne’e tenki iha suku-suku ne’e kontinua, para besik atu nune’e disponibilidade, depois kolaborasaun xefe suku sira atu mobiliza ita-nia populasaun,” nia afirma.

Nune’e mós, nia husu governu liu-liu Ministériu saúde presiza halo planu ida di’ak atu bele hasa’e kobertura vasina liu husi implementasaun iha suku no aldeia sira.

Nune’e mós, ministériu saúde tenki garante stock ekipamentu prevensaun Covid-19 iha fatin vasina hotu.

Antes ne’e, Primeiru-Ministru, Taur Matan Ruak deklara, munisípiu Ermera, taxa partisipasaun komunidade nian bá simu vasina ki’ik liu foin 12% kompara ho munisípiu sira seluk.(ant)