MTKI Selebra Kontratu Pilotu Grupu Turízmu Komunitáriu Ho Suku 5

Smnewstl.com 17-09-2021 (Dili) –Ministériu Turízmu Komérsiu Indústria (MTKI) selebra kontratu kona-ba implementasaun suku pilotu turízmu komunitáriu husi suku 5 hodi dezenvolve fatin turístiku komunitária.

Grupu komunitáriu 5 ne’e mak hanesan, grupu turízmu komunitáriu suku Wailili postu admiinistrasaun Venilale ho montante osan hamutuk rihun 1.200, Waimori husi munisípiu Viqueque ho montante osan rihun $ 16.150.

Suku Seloi husi Aileu rihun $ 49.900 Maubisse vila rihun $ 41.070 dólar no Nunumoge Ainaru rihun $ 30.230 dólar, totál orsamentu finansia projetu lima ne’e hamutuk rihun $ 237.550 dólares amerikanu.

Iha intervensaun, Ministru MTKI, José Lucas do Carmo da Silva hateten, ministériu asina kontratu implementasaun suku pilotu turízmu komunitáriu lima ne’e, bazeia bá proposta ne’ebé grupu refere hato’o bá MTKI.

Tanba ne’e, Governante ne’e husu grupu traballu turizmu komunitáriu sira-ne’e, uza orsamentu refere ho di’ak, liu-liu hatudu kualidade husi implementasaun programa refere, nune’e bele iha sustentabilidade iha futuru.

“Ninia implementasaun ne’e tenki mai ho nia kualidade, ida-ne’e ita brani temi katak, iha ninia sustentabilidade, ne’eduni ninia kontinua bá oin mós depende faze ida-ne’e, ne’eduni faze ida-ne’e dezafia ita ho responsasabilidade boot oinsá bá oin tan,” dehan Ministru José Lucas, sesta ohin, iha salaun MTKI Farol, Dili.

Maki nune’e, José Lucas do Carmo Silva subliña, iha grupu traballu balun nia orsamentu ki’ik no balun boot, maibé ne’e la’ós sai kestaun, maibé importante mak tenki hatudu rezultadu.

“Ida-ne’e númeru ki’ik ga boot la’ós kestaun, kestaun mak agora ita sé nia projetu mak iha kualidade, sé nia programa mak iha kualidade iha iha sustentabilidade, ida-ne’e mak ministru dezafia ita hotu ne’ebé ita hotu involve iha programa ida-ne’e,” dehahn nia.

Sorin seluk, Reprezentante Grupu Traballu Turízmu Komunitáriu, Jeremias da Costa, lori groupu traballu turízmu komunitáriu nia naran, hato’o agradesimentu boot bá governu liu husi MTKI, tanba bele konsidera ona sira-nia proposta hodi finansia ona sira-nia programa dezenvolvimentu turízmu komunitáriu.

“Ha’u agradese tebes bá MTKI tanba povu iha halerik husu beibeik tinan bá tinan, maibé ho oitavu governu ida-ne’e nia prezenta bele suku sira sai hanesan suku pilotu atu komunidade bele sente katak, dezenvolvimentu iha rai ida-ne’e husi duni baze,” dehan Jeremias.

Atuál Koordenadór Grupu Traballu Turízmu Komunitáriu ne’e hatutan, ho selebrasaun akórdu refere, nu’udar responsabilidade ne’ebé nakonu ho dezafius ne’ebé todan, tanba presiza sakrifika aan atu dezenvolve fatin turízmu sira, liu-liu bele fó benefísiu bá komunidade sira.

Maibé nia afirma, dezafius sira-ne’e la’ós sai kestaun no atu dezanima fali vontade husi grupu refere, maibé, obstaklu sai hanesan oportunidade hodi dezenvolve aan di’ak liután.
“Tanba ne’e ha’u husu bá koordenadór grupu sira, ne’e ita simu responsabilidade ne’ebé todan, tanba ita atu lori dezenvolvimentu ida bá ema hotu-hotu nia moris di’ak ne’e presiza ita sakrifika aan hodi hasoru dezafiu tomak ne’ebé mak iha. Maibé, dezafiu la’ós atu dezanima fali ita-nia vontade, maibé dezafiu ne’e rasik sai hanesan oportunidade par oinsá ita bele dezenvolve ita-nia aan di’ak liután iha futuru,” tenik nia.

Entretantu, partisipa iha asinatura kontratu refere, Vise-Ministru Komérsiu Indústria, Dommingos Lopes Antunes, Vise-Ministra Turízmu Komunitáriu no Kultura, Inácia Teixeira, Koordenadór Autoridade Expo Dubai, Manuel Vong, koordenadór husi grupu traballu turízmu komunitáriu 5 no seluk tan.(ant)