MP Aprezenta Testamunha 30 ba Kazu Eis Padre Dasbach, Familia Bo’ot Topu Honis Hakslok Hasoru Xanana

Smnewstl.com Media online-Tribunal Distrital Oecusse liderado Juiz Koletivu Yudit Pamukas, Hugo da Cruz Pui no Evangelino Belo kontinua julga Segunda feira ne’e kazu Topu Honis, ne’ebe envolve eis Padre Dasbach.

Julgamentu kontinuasaun ne’ebe halao tuku sia ho balun dadersan ne’e ho agenda rona deklarasaun husi testamunha ne’ebe aprezenta husi Ministerio Publiku liderado Procurador Matias Soares.

Testamunha hamutuk labarik nain tolu nulu (30) ne’e to’o Tribunal iha oras tuku sia ho kareta Bus husi Orfonato Topu Honis. Antes tama ba Tribunal laran dahuluk kumprimenta ba regra saude mundial hodi fase liman iha portaun seguransa nudar parte ida kontribui ba kombate Kovid-19, ne’ebe sai ameasa mundial.

Enkuanto Kay Rala Xanana Gusmao ne’ebe to’o Tribunal iha oras tuku walu liu minutu lima nulu maske hakat tama ba iha sala julgamentu no konsege tur, maibe antes hahu prosesu tenki husik hela fatin tamba kazu ne’e rasik taka ba publiku desde kedas inisiu.

Eis lider rezistensia ne’ebe husik hela sala julgamentu sai mai areadores Tribunal hasoru malu kedas ho Familia bo’ot Topu Honis kompostu labarik ho inan aman ne’ebe hakbesik ho expresaun hakslok hodi komprimenta malu.

Hanesan bai-bain jestu husi Kay Rala Xanana Gusmao maka sempre hatudo nia domin ba ema hotu liu husi hakoak no rei labarik inklui inan aman sira.

Maske la koalia buat ruma ligado ho kazu ne’ebe diskumfia involve eis Padre, maibe expresaun iha hasoru malu ne’e nakonu ho amizade.

Aliende ne’e, iha momentu importante ne’e, Kay Rala Xanana Gusmao mos kumprimenta aman husi Febrinana matebean (diskumfia ligado ho visum), ne’ebe ho kondisaun ema ho difisiensia matan (difisiente matan).

Prezensa inan aman inklui aman ho labarik sira husi Kutete no Tupu Honis ne’e hodi akompanha testamunha nain 30, nebe aprezenta husi Ministerio Publiku.

Hafoin komprimenta malu no komversa halimar, Xanana mos fila kedas ba nia fatin, enkuanto prosesu ba kazu ne’e rasik kontinua lao hela.

Julgamentu kontinuasaun ba rona deklarasaun testamunha ne’e marka prezensa mos Eis Padre Dasbach ho nia advogado ne’ebe reprezenta husi Miguel Faria, Marcelino Marques, Joao Ndun inkkui Eusebio Guterres no Pedro Aparico.

Dasbach rasik demite ona husi Vaticano nudar padre ligado ho kazu ne’ebe diskumfia nia parte komete hanesan halo violasaun sexual ba minoridade sira iha Topu Honis, maske prosesu judisial sei lao hela.

Ba desizaun Vaticano ne’e, Igreza Katolika Timor Leste liu husi Arcebispo Metropolitan, Dom Virgilio do Carmo da Silva mos hasai ona karta hodi la autoriza Padre no Madre atu koalia buat ruma ligado ho kazu ne’e hodi deside prosesu hotu intrega ba justisa.

Igreza katolika Timor Leste mos konsidera desizaun Vaticano nian tetu ho klean tebes, tamba ne’e husu ba parte hotu atu la interven iha prosesu justisa.

Entretantu prezensa Kay Rala Xanana Gusmao hanesan reafirma ona katak, laos atu halo intervensaun ruma, maibe hakarak atu akompanha hodi hatur justisa ho lolos.

Julgamentu ne’e rasik lao ho diak no hetan seguransa masimu husi PNTL.

To’o informasaun ne’e fo sai prosusu julgamentu sei kontinua halao hela. (Rio)