MNEC Bendito Freitas ho Delegasaun To’o Ona Xína

Smnewstl.com – Ministru Negósius Estranjeirus no Kooperasaun (MNEK), Bendito dos Santos Freitas ho delegasaun kuarta-feira ne’e, to’o ona iha Nanning-Guangxi, Repúblika Popular Xína, iha tuku 11 dadersan oras Xína ho aviaun China Southern.

Chegada Ministru Negósius Estranjeirus no Kooperasaun, Bendito Freitas ho delegasaun to’o iha Aeroportu Internasionál Nanning provínsia Guangxi, simu direta hosi Vise Diretór-Jerál ba Assuntus Estranjeirua provínsia Guangxi, Repúblika Populár Xína, Wei Junying, no akompaña hosi Embaixadór Timor-Leste ba Xína, Loro Horta.

Hafoin to’o, ekipa protokolu hosi Ministériu Negósius Estranjeirus Guangxi, ofisialemente, entrega aifunan ba Ministru Negósius Estranjeirus no Kooperasaun, Bendito Freitas, nu’udar símbolu bemvindu ba Governante ne’e ho ekipa.

Ministru Negósius Estranjeirus no Kooperasaun, Bendito Freitas realiza vizita ofisiál dahuluk mai Repúblika Popular Xína, tanba hetan konvite ofisiál hosi nia omólogu Ministru Negósius Estranjeirus Xína, Wang Yi, no hala’o enkontru bilateral hodi diskute kona-ba reforsu relasaun diplomátika no kooperasaun bilateral entre nasaun rua.

Iha sorumutu bilateral entre Ministru Negósius Estranjeirus hosi nasaun rua ne’e, sei ko’alia liu kona-ba assuntus importante sira-ne’ebé relasionadu ho rai-rua nia interese hanesan, vizita estadu Prezidente Repúblika, José Ramos-Horta nian ba Xína, Belt and Road Cooperation Plan, pozisaun Xína ba South China Sea Issue, no reitera apoiu Governu Xína nian ba adezaun Timor-Leste nian ba ASEAN.

Nune’e mós kooperasaun entre nasaun membru CPLP sira ho Xína, no diskute mós kona-ba Akordu Servisu Aereo (Air Service Agreement) entre Xína ho Timor-Leste. (*/Smnews)