Ministru José Agostinho Lakohi Komenta Kona-ba Kazu Ró Tranship II

Smnestl.com 16-09-2021 (Dili) – Ministru Transporte Komunikasaun (MTK), José Agostinho da Silva deklara, nia parte lakohi atu fó komentáriu bá públiku relasionadu ho kazu ró Tranship II nian ne’ebé prosesu hahú la’o ona iha justisa.

Governante ne’e afirma, nia parte lakohi ko’alia kona-ba kazu ró Tranship II, tanba prosesu la’o ona iha autoridade judisiáriu, tanba ne’e konsidera segredu justisa.

“Ha’u hakarak esplika tan oituan kona-ba ida-ne’e, durante ne’e media na’in hira tuir prosesu tomak, mais prosesu ne’e la’o hela, ha’u hanoin ne’e segredu jurídiku, ne’ebé ha’u hanoin parte hotu-hotu importante oinsá mak kolabora no kontribui bá prosesu ne’e tomak, ne’ebé prosesu ne’e mak orsida sei hatur situasaun ne’e loloos,” dehan Ministru José Agostinho, iha rezidénsia PM Farol, kinta ohin.

Maibé Ministru MTK ne’e deklara, husik prosesu refere la’o hela iha autoridade judisiáriu sira, maibé husik bá faktus mak sei justifika.

“Ne’ebé fraze bahasa indonézia karik dehan, biarlah fakta yang membuktikan, ne’ebé prosesu kuandu la’o ha’u la halo tan komentáriu kona-ba ida-ne’e, agora ita haree de’it prosesu ne’e,”afirma nia.

Antes ne’e mós, Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves deklara, APORTIL seidauk bele halo pagamentu bá ró Tranship II, tanba seidauk hela pereser legál ruma husi Ministériu Públiku ho Komisaun Anti Korrupsaun (KAK).

Maibé Flávio dehan, ró Tranhip II kumpre ona sira-nia dever hodi halo operasaun iha entre Dili bá Oe-cusse no Dili Ataúro, maibé APORTIL seidauk bele selu, tanba dokumentu no invoice pagamentu sira KAK foti hotu ona, no to’o oras ne’e seidauk entrga fali bá APORTIL.

Nune’e mós, antes ne’e, KAK ezekuta mandadu hodi halo buska no apreensaun bá Diresaun Nasionál Transporte Marítima (DNTM), relasiona ho kazu ró Tranship II ne’ebé diskonfia iha irregulariedade iha prosesu kontratasaun no aprovizionamentu.

Entretantu, governu liu husi MTK aluga ró Tranship II hodi halo operasaun iha Timor-Leste durante fulan-rua, hahú iha juñu ho jullu, no kada fulan, governu selu osan ho montante rihun $ 220.(ant)