Ministro Financas Garante Direitu Bá Liña Frente Sei La Lakon

Smnewstl.com (Dili) — Ministru Finansas, Rui Augusto Gomes afirma, subsídiu suplementu remuneratóriu bá ekipa liña frente sei la lakon, maske dekretu-lei ne’e hetan vetu husi Prezidente Repúblika, Francisco Guterres Lú-olo.

Executivo dehan, oras ne’e dadauk, parte jurista halo hela diskusaun, nune’e bele reaprezenta fila-fali bá konsellu ministru atu aprova.

“Dekretu-lei ne’e agora dadauk ne’e ita halo hela diskusaun par depois hahú halo pagamentu. Sim, tanba ne’e mak ita halo diskusaun par atu hadi’a fila-fali par depois lori fila-fali bá konsellu ministru i depois lori bá Prezidente,” informa Ministru Finansas, Rui Gomes, Segunda (02/08/21) hafoin remata enkontru semanál ho Xefe Governu iha Palásiu Governu.

Dekretu-lei ne’e, dadauk ne’e parte jurista sira halo hela diksuan, tanba ne’e sei iha tempu badak sei aprezenta fila-fali bá konsellu ministru hodi halo deliberasaun, hafoin haruka bá Xefe Estadu.

“Jurista sira halo hela diskusaun, se iha dalan par ida-ne’e, direitu ema nian la lakon, agora la’o hela diskusaun ita tempu badak ita sei lori bá konsellu ministru,” dehan nia.

Kona-ba ezekusaun fundu Covid-19 nian, Governante ne’e informa tan katak, ezekusaun fundu Covid-19 atinji ona pursentu 38%.

“Purvolta de 38% depois ami sei fó update ida tempu badak kona-ba ezekusaun ne’e hanusa, ezekuta bá medidas sira-ne’ebé ita aprova tiha ona,” relata Rui.

Maske nune’e, nia salienta katak, ezekusaun bá Orsamentu Jerál Estadu (OJE) tinan 2021 atijin ona pursentu 30 resin.

“Progressu purvolta de 30 itál pursentu ona, mais keta haluha katak, orsamentu 2021 ida-ne’e nia karákter ne’e la hanesan ho orsamentu sira uluk, tanba orsamentu ida-ne’e bazeia bá programa, tantu la’ós montante ezekusaun ne’e mak importante, maibé nia efeitu osan bá programa iha karaik,” nia subliña tan.

Foin lalais ne’e, Ministru Finansas, Rui Gomes reaprezenta fila-fali proposta kona-ba suplementu remuneratóriu kona-ba liña frente bá konsellu ministru, tanba dekretu governu ne’e, Xefe Estadu veta ho rajaun husu atu mantein proposta liña frente tinan 2020 nian.(ant)