Membro Governo ‘Abandona’ PM Taur Iha Ministerio Financas, ‘Hirus’ no Bolu Kedas Atensaun

Smnewstl.com 29-11-2021 (Dili) – Situasaun Extraordinario akontese iha edifisio Ministerio Financas Aitarak Laran Dili, Tersa feira (30-11-2021) bainhira Xefe Governo Taur Matan Ruak simu konvite husi Vise PM no Ministru Planu Ordenamentu, José Maria dos Reis hodi halo abertura bá semináriu kona-ba rezultadu avaliasaun Ex-Post bá projetu infraestrutura asina iha Timor-Leste.

Taur Matan Ruak ne’ebe to’o iha Salao Auditorium Kay Rala Xanana Gusmao iha Ministerio Financas tuku sanulu dadersan tuir agenda tenki tu’ur mesak iha Salao laran hodi hein fali ninia membro governo ho tekniku sira ne’ebe sei preokupa ho hemu kafe.

Taur Matan Ruak sente hanesan abandonado no hirus tebes ninia membru governo sira hodi bolu kedas atensaun ba komisaun organizadora no lakoi atu akontese tan iha futuru.

“Hau sente triste no ‘hirus’ membru governu sira, tanba, bainhira to’o iha ne’e sira sei han no hemu hela kafé. Ha’u la gosta, tanba ha’u to’o mai iha ne’e, ita-boot sira bá han fali, enkuantu ha’u mai tur mes-mesak,” dehan PM Taur ho expresaun ne’ebe hirus tebes iha nia intervensaun.

Ho kestaun ne’e, PM Taur halo xamada atensaun bá komisaun organizadora bá semináriu ne’e, atu tau atensaun bá situasuan ne’e, nune’e labele repete tan iha futuru. “Entaun para próxima ha’u hakarak husu komisaun organizadór sira para tau atensaun bá ida-ne’e,” PM bolu atensaun.

PM Taur mós agradese bá konvite husi MPO, maske iha hela enkontru bá preparasaun Orsamentu Jerál Estadu (OJE) 2022 nian. “Obrigadu bá konvite señór Vise Primeiru-Ministru nian par mai partisipa iha ne’e, apesar de ha’u iha reuniaun ida ké prepara bá orsamentu jeral estadu aban,” dehan PM Taur.

Tuir observasaun Jornalista Smnewstl nian iha salaun Auditorium Xanana Gusmão, hafoin rona tiha intervensaun husi Eis PM, Marí Alkatiri, Xefe Governu, Taur Matan Ruak deside fila kedas bá Palásiu Governu, hodi la konsege akompaña aprezentasaun tékniku husi Diretór Ezekutivu ADN.

Entretantu, partisipa iha semináriu ne’e mak hanesan, Vise PM no MPO, José Reis, Ministru Finansas hamutuk ho membru governu sira, eis Primeiru-Ministru, Marí Alkatiri, tékniku husi Ajénsia Dezenvolvimentu Nasionál (ADN), Obras Públikas no seluk tan.(ant)