Loja Xineza Balun Komesa Manipula Lisensa Negósiu

Smnewstl.com 27-08-2021 (Dili) — Polísia Nasionál Timor-Leste (PNTL) liu husi ekipa konjunta husi Komandu Munisípiu Dili, hahú halo operasaun hodi sosializasaun dekretu governu kona-ba konfinamentu obrigatóriu iha munisípiu Dili bá sidadaun sira hodi bele hatene.

Iha sosializasaun ne’e, ekipa konjunta ne’ebé kompostu husi polísia tránzitu, forsa rezerva, polísia komunitária no mós patrullamentu eskuádra mós tama sai loja sira-ne’ebé la’ós fa’an nesessidade bázika, alfaiati suku ropa, negosiante obralan sira no seluk tan husu atu taka, no autoriza de’it loja mak fa’an nesessidade bázika.

Maibé iha loja xineza balun iha kapitál Dili, tenta atu manipula lisensa negósiu, tanba antes ne’e sira fa’an de’it sasán ropa no seluk tan, maibé hafoin governu aplika konfinamentu obrigatóriu no husu atu taka loja ne’ebé la’ós fa’an nesessidade bázika tama hotu.

Nune’e, xineza sira-ne’e, finjidu tau sasán bázika hanesan fo’os, mina, supermi no seluk tan iha loja oin, enkuantu iha loja laran nakonu ho sasán ne’ebé la’ós nesessidade bázika.

Tanba ne’e, Komandante Polísia Munisípiu Dili, Superintendente Xefe Henrique da Costa hateten, polísia sei foti medida hasoru loja na’in, tanba desobediensia bá rezolusaun governu nian kona-ba konfinamentu obrigatóriu.

“Nesessidade báziku hanesan ai-han bele, fa’an ropa labele, tanba sira fa’an kahur, orientasaun ne’ebé ita hatete mak ne’e, bá ropa sira-ne’e sira tenki hatama tiha, maibé la presiza atu fa’an hotu iha ne’ebá, sé karik sira fa’an hotu ho ropa, entaun ita sei bolu mai par foti medida,” dehan Superintendente Xefe Henrique da Costa, iha knár fatin Kaikoli, sesta ohin.

Superintendente Xefe Henrique da Costa afirma, bainhira sira kontinua kontra dekretu governu ne’e, maka polísia sei loke investigasaun no aprezenta bá ministériu públiku atu prosesa bá tribunál.

“Investigasaun depois impoin regras, tanba iha ne’ebá ne’e kontra ita bele mai halo detensaun foti informasaun de’it, tanba kuandu mai prosesu ona iha PNTL, ita tenki hato’o nia prosesu ne’e bá ministériu públiku, tanba sira mak na’in,” afirma Henrique.

Nia hatutan, PNTL liu husi Komandu Polísia Munisípiu Dili, kontinua halo operasaun bazeia bá rezolusaun governu ne’ebé fó sai ona.

Henrique da Costa mós husu sidadaun sira atu kumpre regras saúde nian hanesan uza máskara, fase liman, no distansia sosiál no labele halibur malu liu ema na’in, nune’e labele fó rísku bá família sira iha uma, no mós bele hadok aan husi pandemia Covid-19 no variante Delta.(ant)