Lere-Riak Husu Veteranus Suai Kopera Fó Susesu Bá Perfurasaun Mina

Smnewstl.com 26-10-2021 (Covalima) – Xefe Estadu Maiór Jenerál FALINTIL Forsa Defeza Timor-Leste (F-FDTL), Tenente Jenerál Lere Anan Timur ho Prezidente Konsellu Kombatentes Libertasaun Nasionál (KKLN), Vidal de Jesus ‘Riak Leman’ husu veteranus Suai atu kopera ho kompañia atu fó susesu bá prosesu perfurasaun mina matan rua ne’e.

Tenente Jenerál Lere Anan Timur hato’o apelu ne’e, bainhira partisipa kari aifunan iha monumentu Setembru Negro 1999, hodi fó onra bá erói sira-ne’ebé mate iha funu, tanba hakarak Timor-Leste ukun rasik aan.

Lere Anan Timur hateten, veteranus barak fakar sira-nia ra’an no balun mate iha tempu funu, tanba hakarak Timor tenki uluk rasik aan.

Lere mós husu líder nasionál sira hahú husi Kay Rala Xanana Gusmão, Taur Matan Ruak, Marí Alkatiri, José Ramos-Horta, Francisco Guterres Lú oli, atu hamutuk hodi fó ezemplu bá jerasaun foun sira.

“Kalan ida-ne’e, ita halo ita-nia serimónia tradisionál, ita mai agradese bá sira-ne’ebé mate ona, tanba sira nia ra’an ho isin mak ohin loron ita bele sai nasaun ida, bele sai povu ida-ne’ebé ho nia kultura rasik, nia tradisaun rasik, ne’e mak husu ita-nia veteranus sira apartir husi Primeiru-Ministru, Prezidente (Repúblika), maun Xanana, Ramos-Horta, Marí, ita tenki hamutuk,” dehan Tenente Jenerál Lere Anan Timur, iha intervensaun hafoin presta omenajen bá eróis sira iha monumentu Setembru Negro 1999 munisípiu Covalima, Tersa ne’e.

Lere mós agradese bá apoiu tomak husi veteranus Australianu sira, tanba perfurasaun mina ne’e konta mós ho sira-nia apoiu.

“Segundu hakarak agradese mós ita-nia maluk veteranus sira Austrália, solidáriu tebes ho ita, mina ne’ebé agora ita ke’e dadauk ne’e, inisiativa sira-nian, sira fó sira-nia apoiu tomak atu bele aban ita hahú ke’e mina,” tenik nia.

Fatin hanesan, Prezidente KKLN, Vidal de Jesus ‘Riak Leman’ hateten, veteranu sira halo funu durante tinan 24, tanba hakarak defende riku-soin Timor-Leste nian.

Riak Leman hatutan, subsídiu no osan terseira idade ne’ebé estadu fó bá veteranus no ferik katuas sira, rezultadu husi fa’an mina iha tasi Timor nian.

Tan ne’e, husu veteranus tomak ne’ebé tur iha konsellu munisipál munisípiu Covalima nian, atu servisu hamutuk ho komunidade, autoridade liu-liu kompañia Timor Resources, nune’e bele fura mina ho susesu.

“Tanba ne’e mak ita-nia dezenvolvimentu ne’e atu la’o, husu bá veteranus sira, unidade, unidade hamutuk ho ita-nia povu fó seguransa didi’ak bá ita-nia mina ne’ebé aban atu fura,” apela Riak Leman.

Riak Leman afirma, prosesu ne’e inisia husi Kay Rala Xanana Gusmão bainhira asume pasta nu’udar Ministru planeamentu Investimentu Estratéjiku (MPIE), iha VI Governu konstitusionál.

Entretantu, partisipa iha serimónia presta omenajen bá erói sira iha monumentu Setembru Negro 1999 ne’e, Primeiru-Ministru, Taur Matan Ruak, Ministru Petróleu Minerais, Victor da Conceição Soares, Vise-Ministru Administrasaun Estatal, Lino de Jesus Torrezão, Vise Xefe Estadu Maiór Jenerál F-FDTL, Maijor Jenerál Falur Rate Laek, Brigadeiru Jenerál na’in tolu.

Veteranu, Administradór Munisípiu Covalima, Francisco de Andrade, komunidade no mós entidade seluk tan iha Covalima.(ant)