Lere Hakarak Hatene Kauza Husi Asidente Ainaro, ‘La’ós Efeitu’

Smnewstl.com 03-09-2021 (Dili) — Xefe Estadu Maiór Falintil Forsa Defeza Timor-Leste (F-FDTL), Tenente Jenerál Lere Anan Timur hakarak hatene kauza husi ekipa avansadu Tour FALINTIL ne’ebé hetan asidente iha Nunumoge munisípiu Ainaru.

Ekipa avansadu Tour FALINTIL, hetan asidente kareta baku fila iha parte Nunumoge Munisípiu Ainaru, iha loron 24 fulan Agostu foin lalais ne’e, bainhira atu halo viajen bá Munisípiu Covalima hodi halo preparasaun atu simu VIP sira hodi komemora loron FALINTIL bá dala-46 ho tema dalan bá dame.

Asidente refere, rezulta membru F-FDTL feto ida husi komponente Naval mak lakon vida, enkuantu na’in 5 seluk sofre kanek.

Tanba ne’e, Tenente Jenerál Lere Anan Timur konfirma, fó ona ordem bá Xefe Estadu Maiór, atu halo balansu operasaun ne’ebé ho krítiku bá asidente refere, ekipa avansadu sira-ne’e hetan asidente, bainhira hala’o hela misaun.

“Foin dadauk sira haruka relatóriu mai mais ha’u dehan, laiha imi haruka relatóriu mai ne’e la’ós efeitu de’it, kauza saida mak halo kareta baku fila, bele lanu, bele la kontrola velosidade, entaun presiza balansu de operasaun,” dehan Tenente Jenerál Lere Anan Timur, iha knar fatiin kuartél jenerál F-FDTL Fatuhada, Dili. Sesta ohin.

Líder ezérsitu ne’e konsidera, dala barak, matenek na’in sira aprezenta de’it relatóriu laiha balansu, tanba haree liu bá parte ne’ebé di’ak, maibé la haree bá parte ne’ebé la di’ak.

“Depois relatóriu ida-ne’ebé kompletu, porque dala barak ema matenek sira-ne’e fó de’it ne’ebé di’ak, ninia aat ne’e lakohi relata, ne’ebé bá ami iha ne’e kauza no efeitu, saida mak halo ema mate, ema lakon, ema kanek buat sira-ne’e, la’ós kanek ida-ne’e bá ona ospitál, ida gráve, ida-ne’e la’ós importante, ha’u hakartak kauza ne’e, par futuru mai ne’e ita bele kurije,” afirma Lere.

Prosesu investigasaun bá kazu asidente refere la’o hela, tanba ne’e nia labele foti uluk konkluzaun.

“Ha’u hanoin katak, ida-ne’e ita sei prosesa, prosesu la’o depois mak ita to’o konkluzaun nia lori própriu inisiativa ga ou orden depois kauza seluk mak provoka efeitu sira-ne’e, agora labele prosesu seidauk la’o ita fó konluzaun ida-ne’ebé lójika,” Lere dehan tan.

Tenente Jenerál ne’e afirma, instituisaun F-FDTL iha ninia métudu no medidasa dministrativas militár ne’ebé mak todan tebes.(ant)