Lakohi “Kumu Liman Mamuk”, Militante FRETILIN Hatulia B Prontu Fó Vitória Ba Xanana

Smnewstl.com– ERMERA 02 Abril 2023– Prezidente Partidu Congreso Nacionál de Reconstrução de Timorense (CNRT), Kay Rala Xanana Gusmão hato’o agradese ba estrutura no militante partidu FRETILIN Postu Hatulia B, Suku Poetete, Aldeia Sametrai no aldeia sira seluk lakohi kontinua “kumu liman mamuk” hodi prontu fó vitória ba Xanana Gusmão eleisaun 21 Maiu 2023.

“Ha’u agradese tebes ba povu sira iha Hatilia B, Suku Poetete ho aldeia sira foin lalais ba ho ema nia aman ida ne’eba, Samuel Marçal ba sira nia ekipa sira hotu- hotu ne’eba mean (FRETILIN), bar-barak loos mak simu sira, komesa hasai kamiza tau fali CNRT nian. Ida ne’e hatudu katak, povu akompaña saida maka akontese iha governu ida ne’e nunka halo buat ida atu hadia povu no dezenvolve nasaun ne’e, tanba ne’e ha’u apresia ho imi nia obserbasaun hodi fó fiar fali ba partidu CNRT,” dehan Xanana durante konsolidasaun partidu CNRT iha Suku Lesidere, Dili domingu 02/04/23)

Xanana husu ba ekipa HAP no partidu CNRT kontinua servisu makas liu-liu konsolidasaun tama sai uma komunidade hodi fó fiar ba povu atu haree no vota ba partidu CNRT nu’udar partidu politikus ne’ebé iha prinisipiu no programa diak atu hadia no hala’o dezenvolvimentu ba rai ne’e.

Entretantu, Koordenador Partidu FRETILIN Postu Hatulia B, Lideradu Kamarada Fransisco deklara prontu apoia Xanana hodi hetan vitória.

“Ha’u hakarak informa Postu Ermera Hatolia B Suku Poetete Aldeia Sametrai no aldeia lima prontu iha filheira ida hamutuk ho Partidu CNRT, ohin ami hamutuk 217 militantes. Ida ne’e maka povo Ermera- oan sira prontu mai apoiu maximu ba Maun Boot Kay Rala Xanana Gusmão no lori vitória ba Partidu CNRT iha eleisaun parlamentar 2023,” dehan Koordenador Partidu FRETILIN Postu Hatulia B, Lideradu Kamarada Fransisco bainhira partisipa konsolidasaun Partidu CNRT ne’ebé organiza hosi Hamutuk Apoia CNRT (HAP-CNRT), sabadu 1 Abril 2023.

Iha oportunidade ne’e, Kamarada Fransisco hamutuk ho militante na’in-205 halo kedas deklarasaun politika simu direita hosi Koordenadór HAP-CNRT, Samuel Marçal ho ekipa hodi entrega atributu partidu CNRT no Bandeira ba militante sira hodi hasa’e iha uma oin nu’udar jestu apoia partidu CNRT.

Iha fatin hanesan, Koordenador HAP-CNRT, Samuel Marçal deklara CNRT lideradu Xanana iha programa no vizaun di’ak atu hadia rai ne’e, tanba ne’e hosi ba povu tenki fó fiar nafatin ba partidu CNRT hodi hetan vitória iha eleisaun parlamentar tinan ne’e.

Nia dehan hamutuk ho Xanana maka TL bele manan fronteira maritima hasoru Austrália no prontu negosia ho kompaña no Governu Austrália hodi dada mina greater sanrise mai Timor-Leste.

Samuel hatutan, durante ukun tinan balun de’it, Xanana konsege halo dezenvolvimentu ba Timor-Leste hanesan  investe ba eletrisidade lakan iha teritóriu Timor, hadia estrada nasionál, hadia infraestrutrua edukasaun, saúde, rezolve problema PNTL no F-FDTL no problema seluk tan.(Smnews)