Laen Sofre Struk Hafoin Simu Vasina Astrazaneca, Inan ho Oan Tanis Halerik Mesak Iha Kos

SMNewstl.com-Duarte da Silva (62), sidadaun ida husi Aldeia Fuslam, Suco Bairo Pite, Posto Administrativo Dom Aleixo, Municipio Dili sofre struk durante fulan resin ona hafoin simu doze dahuluk vasina Astrazaneza iha loron, 26 Fulan Maio 2021 ne’e.

Situasaun ne’e ubriga Duarte tenki toba los no susar atu halao atividade hanesan bai-bain ate atu ba deit haris fatin mos labele hotu.

Duarte haknar a’an hanesan Seguransa iha Universidade Nacional Timor Leste hodi sustenta nia kaben Maria Tunes ho oan feto rua Lidia Maria Fatima da Silva (11) no Carla Maria da Silva (9).

Durante strok fulan rua resin, Duarte ho kaben no oan rua hamahan a’an deit iha uma kos. Razaun hela iha kos tamba Duarte nia uma lokaliza iha foho lolon nune’e susar ba nia atu bele lao sae kauza husi sofrementu moras ne’ebe infrenta.

Maria Tunes haktuir kronologia katak, Duarte simu Vasina Astrazaneza iha loron 26 Maio 2021, no sofre strok iha loron 30 Maio 2021.

Hanesan kaben ne’ebe sempre akompanha jornada laen nia, Maria relembra, antes ne’e Duarte ho kondisaun fiziku diak. “Nia kondisaun diak hela, ami simu Vasina iha loron 26 Maio 2021. Iha loron 30 Maio 2021, nia iha servisu fatin maka hau simu informasaun katak, nia monu no tos tia ona. Hau ba to’o iha neba, nia la kuinese tia ona hau, entaun ami lori ba Hosptal tratamentu la diak, nune’e lori fali deit mai uma. Ami nia uma iha foho leten, maibe hare nia kondisaun araska, entaun ami mos la ba uma no hela deit iha fatin Kos ida ne’e,”informa Maria ho matawen.

Situasaun tristeza ne’ebe kontinua hafalun metin Maria maka atu halerik los ba se’e. MEdia GMN ho RTTL mai foti ona, maibe to’o agora mak hanesan ne’e hela. Hahan araska, hau nia kaben nia familia iha Ermera, labele mai, hau nia familia iha hotu Oecusse, situasaun mukit tebes”.

“Horibainruak mak familia sira lori hela hahan oituan mai, maibe hotu tia ida ne’e sira mos ba ona. Hau mesak labele halo buat ida, Kos nain ejize atu selu ona, hau ba buka osan iha nebe, ami nia esperansa maka nia (Duarte), agora nia toba deit, ami labele halo buat ida”.

Familia sira hare, maibe tuir kbi’it. Hau nia oan nain rua tanis ba hau, ama agora ita halo oinsa, hau hatan deit ba sira, reza deit ba maromak hodi nune’e imi nia aman bele diak hodi tau matan mai ita. Sira ba Escola, fila mai husu hahan, hau dehan ita so iha deit mak etu maran, ida ne’e deit mak ita bele han augbenta hodi hein maromak nia grasa.

“Hau lakon tia ona esperansa, hau rona Avo Xanana ajuda ema iha fatin, fatin, entaun hau buka dalan. Horseik (Segunda feira, 02-08-2021), hau husu tuir dehan iha Lecidere, entaun ho hau nia oan feto kik, dader deit ami rua ba iha neba, no ho grasa maromak, seguransa sira atende hodi hato’o ba Avo nune’e Avo Xanana fo ami fos ho mina tula kedas iha kareta homos osan balun. Ho hau nia oan, ami agradese tebes bele hasoru Avo Xanana, nune’e ami kontinua augbenta dadauk hodi halo tratamentu ba hau nia laen, ne’ebe hanesan ami nia mahon”.

Lidia Maria Fatima Lurdes rekuinese katak, susar tebes ba moris ida ne’e kuando aman sofre moras.

“Apa sei diak ladiak liu no la a’at liu mos ami iha esperansa, agora apa moras tia, ami susar tebes. Ami nia esperansa maka apa bele diak hodi ami mos fila ba uma.