La Selu Taxa ba Estado, KAK Kaptura no Detein Emprezario Nain 4

Smnewstl.com (Dili) — Ekipa Investigador iha Diresaun Investigasaun Kriminál Komisaun Anti Korrupsaun (KAK), Tersa-feira (17/8) ohin ezekuta mandadu Tribunal Distrital Dili (TDD) nian hodi kaptura no detein emprezariu estrantejeiru nain hat (4). Aksaun represivu ne’e CAC ezekuta bazeia ba mandadu ne’ebé asina husi juiz Ersilia de Jesus.

Ezekusaun mandadu buska, apreensaun, kapturasaun no detensaun ba arguidus nain hat investigador CAC halo tamba (4) ekipa investigador halao iha fatin hat diferente; Mandarin, Fatuhada, Bairopite no Campus ICS Comoro Dili.

Detidus nain hat ne’e nudar emprezarius nain ba kompanha rua ne’ebé maioria manan projeitus supply ekipamentus saude no aimoruk iha Ministeriu Saude no Regiao Administrativa Especial Oe-Cusse Ambeno (RAEOA) Oecusse maibe la selu taxa ba Estadu durante tinan sia (9) nian laran husi tinan 2012 too 2020.

Kazu ne’e rasik investigador CAC mak akompanha no halo investigasaun. Iha prosesu investigasaun ne’e revela indisus krimi forte hodi investigador CAC sira halo promosaun ba prokurador titular iha Ministeriu Publiku no promove ba iha juiz tribunal Distrital Dili hodi hatun mandadu no CAC ezekuta iha loron ne’e.

Rezultadu servisu sekreta CAC nian iha terenu revela katak kompanha sira ne’ebé suspeitu nain 4 nain ba kontinua manan projeitus iha Ministeriu Saude no iha RAEOA Oecusse maske kompanha ninian dividas invalid (mate) ona.

Investigador CAC nia sei halo investigasaun klean liu tan hodi rekolha informasaun, evidensias iha Ministeriu Saude, Instituisaun autonoma SAMES, Ministeriu Finansas no RAEOA Oecusse laran atu revela verdade iha prosesu aprovizionamentu durante julgamentu iha tribunal iha future.

Iha ofisial balun halo pratika foer la tuir prinsipiu boa-governasaun nian iha Diresaun aprovizionamentu Ministeriu Saude no ofisial sira iha Ministeriu Finansas nian hodi fo prejuizu ba Estadu ho folin boot durante tinan 9 nian laran.

Iha operasaun buska, apreensaun no detensaun loron ohin nian, investigador CAC konsege halibur dokumentus lubuk ida sobre projeitus balun iha Ministeriu Saude ne’ebé kompanha rua ne’e manan nudar evidensia no objetivu krimi.

Ekipa investigador CAC servisu hamutuk ho Polisia Nasional Investigasaun Kriminal (PNSIK) kaptura no lori arguidus sira mai iha edifisiu CAC Farol. CAC sei detein sira durante 72 horas molok aprezenta ba iha tribunal hodi tuir primeiru integrogatoriu.

Suspeitu estranjeiru mane nain rua ne’e ida doutor ne’ebé uluk servisu iha hospital no ida seluk emprezariu ho nasionalidade Srilanka maibe kaben ho suspeitu feto Timoroan seluk. Suspeitu feto seluk nudar emprezariu joven no universitaria ida estuda iha ICS Comoro Dili.

“Depende ba dokumentus sira ne’ebé ohin ami buska no prende ne’e relasaun maka’as liu ba iha Ministeriu Saude no iha RAEOA Oecusse. Liu-liu (fornesimentu) ekipamentus saude no aimoruk,” Diretor Nasional Investigasaun Kriminal CAC Emilio Quintas informa. (*)