La Hetan Osan front Line, Traballadór APORTIL Blokeia Portu Dili

Smnewstl.com 17-11-2021 (Dili) – Traballadór servisu operasionál Autoridade Portuáriu Timor-Leste (APORTIL), Kinta-feira ne’e halao asaun greve hodi la autoriza hasai kontentor husi Portu Dili, tamba konsiderado parte kompotente la konsidera sira nia servisu.

Xefe Departamentu Movimentasaun Kargas no Armazenamentu APORTIL, Yaser Arnaldo Bin Ali fundamenta katak, durante implementasaun serka sanitária no konfinamentu obrigatóriu parte APORTIL la kuinese loron feriadu no nafatin halao servisu hanesan bai-bain ho ministerio sira seluk.

Nia hatutan, tinan kotuk, APORTIL hetan subsídiu liña frente, maibé tinan ida-ne’e, Ministériu Finansas la konsidera sira hodi afirma katak, lei la fó dalan nune’e halo sira tristem

“Nu’udar Xefe Departamentu Movimentasaun Kargas no Armazenamentu APORTIL, ha’u ladún satisfas, tanba durante serka sanitáriu funsionáriu hotu-hotu tama, ami-nia servisu apoiu makas no movimentu mós la’o kalan, to’o ikus iha liafuan ida hateten katak, APORTIL laiha dalan atu simu osan front line, ne’e labele,” kestiona Porta-voz, Yaser Arnaldo Bin Ali, iha knár fatin, Portu Dili, Kinta-feira ne’e.

Yoser sublinha, asaun greve ne’ebé sira halo maka blokeia total no sei la asina dokumentu atu hasai kontentor no sasán sira husi Portu Dili.

“Ha’u la brani fó asinatura atu asesu pass par kontentor sira atu sai, ami halo hanesan ne’e par parte balun bele hatene katak, APORTIL mós importante bá nasaun ne’e ga la’e, APORTIL nia funsionáriu servisu iha serka sanitáriu ne’e ga la’e, tanba ami mós servisu hanesan mós sira seluk,” dehan nia.

Nia hatutan, sira submete hotu ona lista bá Ministériu Finansas atu bele hetan mós subsídiu ne’e, tanba durante implementasaun serka sanitáriu ho konfinamentu obrigatóriu, diresaun tolu iha APORTIL kontinua halo servisu hanesan baibain.

Sorin seluk, Broker husi Kompañia Bolore Port, Isaias da Costa lamena ho asaun ne’ebé traballadór APORTIL sira halo hodi taka totál odamatan boot Portu Dili, tanba sira labele atu hasai sira-nia sasán ne’ebé dadauk ne’e iha ona Portu Dili.

Isaias da Costa afirma, problema subsídiu ne’e internal APORTIL, tan ne’e, labele atu blokeia fali servisu ema seluk nian, tanba kuandu nesessidade bázika la sai husi Portu Dili, maka sei afeta bá populasaun sira no sei kontribui bá presu sasán sei sa’e.

“Ne’e impaktu boot bá ami Broker ho ajénsia, ne’e sei fó impaktu boot bá ita-nia nasaun ho povu sira, sé karik fo’os mina la sai husi Portu entaun ne’e impaktu la’ós bá ami de’it, bá ita hotu iha nasaun ida-ne’e, ita presiza, tanba agora dadauk ita sasán mai husi importasaun de’it,” lamenta nia.

Hatán bá kestaun ne’e, Prezidente APORTIL, Flávio Cardoso Neves hateten, asaun greve ne’ebé traballadór APORTIL sira halo la hetan orientasaun husi konsellu administrasaun APORTIL, tanba antes ne’e konsellu administrasaun esplika ona bá sira katak, APORTIL sei la hetan direitu subsídiu ne’e.

“Asaun ne’ebé sira halo ne’e konsellu administrasaun lahatene, iha loron hira liu bá ita fó esplikasaun katak, ema ne’ebé tama iha liña frente ne’e bazeia bá iha rezolusaun konsellu ministru klaru no mensiona iha ne’ebá, tanba iha ne’ebá mak laiha naran APORTIL,” dehan Prezidente APORTIL.

Flávio Cardoso subliña, durante ne’e debate iha Parlamentu Nasionál sempre ko’alia kona-ba suplementu remuneratóriu bá APORTIL, tan ne’e, ho informasaun ne’ebé iha, fó esperansa bá sira, maibé ikus mai APORTIL la hetan.

Maski nune’e, konsellu administrasaun kontinua akonsella traballadór sira atu kalma, tanba atu buka solusaun bá kestaun ne’e presiza tempu, maibé husu atu labele taka atividade servisu operasionál iha Portu Dili.

“Tanba ne’e ha’u fó orientasaun bá sira loke nafatin, atu atividade ne’e la’o nafatin, tanba agora dadauk sasán hotu-hotu tama husi Portu Dili, kuandu taka afeta mós bá atividade seluk,” afirma nia.(ant)