L7 Preukupa Kondisaun Servisu Komandu Polísia Munisípiu Dili

Smnewstl.com 10-09-2021 (Dili) – Vise Prezidente Komisaun B ne’ebé trata bá assuntu defeza, seguransa no negósiu estranjeirus, Cornélio Gama ‘L7’ preukupa ho kondisauun fatin servisu polísia tránzitu nian iha komandu polísia munisípiu Dili nian ne’ebé gráve tebees.

Cornélio Gama ‘L7’ hato’o lamentasaun ne’e, bainhira halo vizita privadu bá iha komandu polísia munisípiu Dili, sesta ohin, ne’ebé akompañadu husi Komandante Polísia Tránzitu Nasionál, Inspetór Domingos Gama.

Iha vizita ne’e, Deputadu bankada PLP ne’e observa mós fatin servisu polísia tránzitu nian ne’ebé laiha kondisaun di’ak bá sira hodi halo servisu ho di’ak, inklui haree mós kondisaun haris fatin iha sela polísia nian ne’ebé durante ne’e la funsiona.

L7 hateten, bainhira resesu ka féria parlamentár tama fali iha dia 15 fulan Setembru semana oin, sei aprezenta kestaun ne’e iha komisaun B, no mós iha plenária Parlamentu Nasionál, nune’e husu governu atu bele atensaun.

“Klarumente haree mós ajuda polísia oinsá par bele kondisaun polísia nia fatin sira-ne’e atu bele halo di’ak, maibé ohin ha’u mai partikulár aproveita hasai ida-ne’e. Aproveita hasai ida-ne’e par aban bairua resesu ne’e remata, ami tama fali servisu ha’u aprezenta iha komisaun B atu bele hadi’a di’ak liu polísia sira iha Dili laran ne’e,” dehan L7 iha Komandu Dili.

L7 konsidera, ho kondisaun haris ne’ebé la funsiona ne’e, bele hamonu imazen Timor-Leste nian, bainhira hetan vizita ruma husi parseiru internasionál ruma bá iha komandu polísia munisípiu Dili nian.

“Sé la’e ita haris fatin ne’e ema nasaun seluk mai haris fatin ne’e halo mo’e fali RDTL afinál haris fatin mós la di’ak, kadeira mós la di’ak, depois armari rai lívru fatin mós la di’ak hotu, ita kuandu la ko’alia ida-ne’e, governu hanoin buat di’ak hotu de’it entaun la interese ona,” afirma nia.

Eis guerilleiru ne’e rekoñese, PNTL liu-liu unidade tránzitu mós kontribui reseitas bá kofre estadu ho montante ne’ebé boot liu-liu husi koima ne’ebé mak infratór sira komete.

Maibé realidade, kondisaun servisu polísia tránzitu nian, inklui kareta no motor mós kondisaun la di’ak ona, ne’ebé presiza halo manutensaun no sosa foun hodi bele apoiu servisu polísia tránzitu nian.

“Hanesan mós kareta, motor servisu sira-nian ne’e ami tenki reklara iha komisauun B, par diskuti iha parlamentu atu bele hadi’a polísia sira-nai fatin ne’e. Agora resesu hotu tiha ami tenki mai, Dili ami seidauk bok ida, fora de Dili ami haree hotu ona,” hateten L7.(ant)