Kumpri Dekretu Governo, Mercado Taibesi Loke Tuku 6 Dader no Taka Tuku 6 Lokoraik

Smnewstl.com 28-08-2021 (Dili) — Responsável sira iha Merkadu Tasibesi (MT) kumpre dekretu governu kona-ba konfinamentu obrigatóriu iha munisípiu Dili, nune’e autoriza loke merkadu hahú husi tuku 6 Dader no taka fali iha tuku 6 lokraik.

Koordenadór Merkadu Tasibesi, António Manuel de Araújo informa, medidas ida-ne’e sira foti, tanba simu orientasaun husi Munisípiu Dili no mós parte Polísia Nasionál Timor-Leste (PNTL) inklui ministériu saúde, nune’e kontájiu surtu Covid-19 no variante Delta iha merkadu Taibessi.

“Iha merkadu ita loke 6 oras dader ita tenki taka fali iha 6 oras lokraik, iha halo par movimentu ne’e labele makas liu iha oras ne’ebé mak ita taka ona merkadu, horseik kompradores sira balun mai lokraik dehan, nusa mak merkadu taka.? Ha’u dehan, ita-boot rona avizu husi PNTL to’o iha Dili laran tomak katak, ita tenki limita,” dehan Koordenadór Merkadu Taibessi, António de Araújo, iha knár fatin sábdu ohin.

Antónia dehan, maske iha ona konfinamentu obrigatóriu, maibé atividade negósiu iha merkadu Taibessi kontinua la’o normál, maibé nafatin apela bá vendedór ho kompradores sira atu kumpre nafatin regras saúde nian, hanesan uza máskara, distansia sosiál no seluk tan.

“Iha dia 25 dia 26 parte seguransa PNTL direitamente mak fó avizu ho transporte uza autoflántiku (toa) husi ministériu saúde mós mai fó avizu tuir regras oin sia iha ne’ebá, hotu-hotu tenki vasina, hanesan koordendór iha merkadu Tasibesi ho membru sira mantein hela orientasaun ne’ebé mak agora ita implementa iha konfinamentu obrigatóriu,” afirma nia.

Koordenadór ne’e haktuir, sira mós simu orientasaun husi PNTL ho Ministériu Saúde, atu limita kompradores sira tama iha merkadu laran, liu-liu bainhira tama tenki uza máskara no mós labele halibur malu.

Alem de ne’e, bandu mós transporte públiku hanesan mikrolete no táksi labele halo sirkulasaun iha areadores merkadu Tasibesi bazeia bá dekretu governu ne’ebé fó sai ona.

“Tuir orientasaun ne’ebé mak ita simu katak, ita tenki limita iha parte balun iha merkadu hanesan taka terminál bá transporte públiku labele halo sirkulasaun hanesan mikrolete, táksi iha tenki taka iha fatin ne’ebá, loke nafatin vantajen bá vendedores no kompradores mai sosa sasán tuir regulamentu ne’ebé iha, mai sosa ai-han, mais ita limita sira mai tenki taka máskara, labele la’o rame-rame,” subliña nia.

Alem de ne’e, responsável sira iha merkadu Taibessi mós prepara ona bee fase liman hamutuk tanki tolu, maibé iha tanki rua mak avaria ona, no hela ida de’it mak funsiona hela.

Ho bee ne’ebé mak prepara ne’e, bainhira kompradores sira tama merkadu laran tenki fase liman, nune’e bele prevene aan husi rísku kontájiu surtu Covid-19 no mós variante Delta.(ant)