Kontinua Loke Loja, PNTL Kaptura Kaer Ema Na’in 50

Smnewstl.com 03-09-2021 (Dili) — Ekipa konjunta Polísia Nasionál Timor-Leste (PNTL), kaptura kinta-feira horseik (02/09/21) sidadaun na’in 50 ne’ebé kontinua hala’o servisu iha loja no balun servisu iha kompañia produsaun batako, tanba viola regra konfinamentu obrigatóriu.

Ekipa konjunta ne’ebé kompostu husi Komandu Polísia Munisípiu Dili, eskuádra polísia Dom Aleixo, forsa rezerva, investigasaun no mós polísia tránzitu, hafoin kaptura sidadaun na’in 50 ne’e hafoin halo operasaun iha Kapital Dili.

“Horseik ita bá iha parte Dom Aleixo ninian, iha fatin rua, ita-nia patroli konjunta kaptura no bolu ema hirak ne’ebé mak halo hela servisu iha ne’ebá ne’e lori mai edifísiu hodi halo identifikasaun, ema hamutuk na’in 50 na’in 4 sidadaun estrajeiru, sira halo hela batako ka servisu konstrusaun ninian iha área Manleuana Dom Aleixo ninian,” dehan Komandante Polísia Munisípiu Dili, Superintendente Xefe Henrique da Costa, iha knar fatin Kaikoli, sesta ohin.

Sidadaun hirak ne’e, depois de identifikasaun hotu, subemete kedas bá teste swab molok haruka fila bá uma, no PNTL husu atu labele repete tan hodi viola rezolusaun governu n°.115/2021, 26 de Agostu, kona-ba konfinamentu dmisiliáriu jerál iha munisípiu Dili.

Superintendente Xefe ne’e dehan, polísia labele submete sira bá iha sela polísia hodi kumpre oras 72, tanba espasu la sufisiente, inklui labele halibur ema barak, miabé polisia kontinua halo prosesu kriminál bá sidadaun hirak ne’e.

“Halo tiha identifikasaun prosesu kriminál ita kontinua, soke ita labele tahan sira-ne’e iha ne’e 72 oras, tanba sira barak ita halo identifikasaun depois ita haruka fila, prosesu nafatin depois de ita kaptura sira, ita-nia parte investigasaun liga kedas ho prokuradór turnu, prokuradór distritál Dili ninian, ita halo prosesu krime desobediénsia,” esplika nia.

Rezolusaun governu ne’e haruka ema hotu atu hela iha uma no labele saibele autoriza de’it bá sira-ne’ebé atu sosa nesessidade bázika, bá ospitál, atende xamada husi tribunal no polísia, nune’e prevene aan husi kontájiu Covid-19 np variante Delta.(ant)