Konstrusaun Ró Berlin Ramelau Iha Ona Faze Final, Outubru To’o TL

Smnewstl.com 06-09-21 (Dili) — Prezidente Konsellu Administrasaun Autoridade Portuáriu Timor-Leste (APORTIL), Flávio Cardoso Neves hateten, prosesu konstrusaun bá ró berlin Ramaleu iha ona faze finalizasaun, tanba ne’e posibilidade iha inísiu fulan outrubru ró refere to’o ona iha Timor-Leste.

Tanba iha fulan Maiu tinan ida ne’e, kompañia konsultór halo lansamentu dahuluk ró Berlin Ramelau bá tasi iha estaleiru Xinéz Damen Ychian, ho objetivu atu hatene kondisaun téknika saida mak presiza atu kompleta tan.

“Konstrusaun ró Berlin Ramelau ne’e ita halo koordenasaun online ho Alemanhã, Holanda, Xina ho Timor-Leste, grasas de deus, tanba iha ne’ebá ne’e iha konstrusaun iha mós kompañia ne’ebé ita fó bá halo konsulta bá ró berlin Ramelau mak husi Alemanhã IMS nort. Domingu ida liu bá, sira bá halo final test liu-liu bá iha prova de mar, iha prova de mar ne’e ita atu hatene katak, teste final ne’e saida-saida de’it mak ita tenki haree tenki tuir duni kriteria, nune’e konstrusaun bele tuir design no mós kritériu tékniku liu sira tenki prienxe,” dehan Preazidente APORTIL, Flávio Neves, Segunda ohin.

Konsultór ne’e, governu Alemanhã selu ho valor orsamentu hamutuk milliaun $ 1.4 euro, nune’e bele iha garantia másimu katak, prosesu konstrussaun bá ró refere tuir duni padraun internasionál no kontratu ne’ebé iha.
Prezidente APORTIL ne’e realta tan katak, dadauk ne’e APORTIL hasoru problema, tanga kompañia konstrusaun Damen ne’ebé konstrui ró refere, kontrata ona tripulante atu lori ró ne’e mai Timor-Leste, maibé pandemia Covid-19 mak difikulta tiha prosesu refere.

“Agora ita hasoru problema mak ida-ne’e, ró ne’e kuandu atu mai kompañia manán konstrusaun ró Damen, sira sei fó kontratu fali ema balun husi nasaun seluk atu lori ró ne’e mai Timor, tanba ne’e mak ita hasoru situasaun ida-ne’ebé pandemia iha Xina dalaruma normal, dalaruma sa’e, tanba ne’e mak afeta mós bá planu inisiál sira-ne’e,” dehan nia.

Maibé parte APORTIL mós prepara ona pessoál ida hodi reprezenta governu Timor-Leste atu aranka bá Xina hodi haree besik liután kondisaun ró refere.
Antes ne’e, Prezidente APORTIL, Flávio Cardoso Neves hateten, ró refere sei to’o Timor-Leste iha fulan Setembru tinan 2021, maibé iha mudansa bá oráriu bá fulan outrubru no novembru, tanba nasaun Xina enfenta hela situasaun pandemia Codid-19.

“Planu inisiál iha setembru, mais la setembru nia bele to’o iha outrubru, tanba tripulánte ne’ebé atu lori ró kompañia prepara bele tama ona iha Xina, depois ita-nia ema ne’e mós bele bá atu bele akompaña prosesu ne’e,” subliña nia.

Entretantu, ró Berlin-Ramelau bele lori pasajeiru hamutuk 308, veíkulu no karga sira, no mos sei apoiu bá ró-ahi dahuluk Berlin-Nakroma hala’o viajén entre Dili-Oekusi no Ataúru.
Nia naran, reprezenta kapitál Alemaña nian no foho ne’ebé aas liu iha Timor-Leste, no mós sai hanesan referénsia ida bá ko-finansiamentu bá ró-ahi husi governu nasaun 2 ne’e.(ant)