Konsellu Ministru Halo Revizaun Bá Valór Tarifa Konsesaun Penalidade Portu Tibar

Smnewstl.com (Dili) — Konsellu Ministru (KM), aprova ona projetu deliberasaun kona-ba revizaun bá valór tarifa bá taxa konsesaun bá penalidade portu Tibar.

Proposta ne’e aprezenta husi Ministru Finansas, Rui Augusto Gomes, tanba ho aprovasaun ne’e, dekretu-lei refere sai ona hanesan objetu deliberasaun nian iha reuniaun konsellu ministru iha loron 28 fulan-Jullu foin lalais ne’e.

Ministru Prezidénsia Konsellu Ministru, Fidélis Leite Magalhães hateten, ho alterasaun ne’e, atu mellora liután ninia justifikasaun hodi bele fó protesaun di’ak entre estadu ho kompañia ne’ebé halo servisu.

“Entaun ne’e la’ós alterasaun ne’ebé mak boot husi buat ne’ebé mak aprovadu tiha ona, apenas halo di’ak liután tan de’it ninia justifikasaun sira bá deliberasaun, hodi nune’e, buat ne’ebé konsellu ministru deside, fó protesaun ne’ebé di’ak liu bá ida-ne’ebé konsede katak bá estadu no mós bá privadu konsesionáriu ne’ebé mak halo servisu,” dehan Ministru Fidélis Magalhães, kuarta (11/08/21) iha Palásiu Governu.

Ho deliberasaun ne’e mós, atu reflete di’ak liután espíritu kontratu entre kompañia ho estadu, tuir kompeténsia ne’ebé konsellu ministru aprova.

“Konsellu ministru aprova ona projetu deliberasaun kona-ba revizaun bá valór tarifa bá taxa konsesaun bá penalidade portu Tibar nian, ho espíritu ida-ne’e mak konsellu ministru halo desizaun toma konta konsiderasaun husi parte privadu nia preukupasoens sira konsesionáriu ne’ebé halo servisu iha Portu Tibar no mós husi parte estadu,” esplika nia.

Nune’e mós, revizaun bá valór refere ho fatór indeksaun 1,061, ne’ebé konsidera diminuisaun tráfegu karga nian, ne’ebé kompara ho previzaun sira, maibé konsidera mós realidade ekonómika iha tinan hirak ikus ne’e, tanba difikulta husi pandemia Covid-19.

Maibé, konsidera mós vontade konsesionária atu kontinua dezenvolve projetu no hahú opera ho lalais, tanba valór sira-ne’ebé mai husi revizaun ne’e, hanesan mós ho valór sira-ne’ebé sei vigora hela, bainhira konsesionária hahú ona data operasaun ne’ebé prevé ona.(ant)