Komunidade Sira Halerik Aihan Ba Xanana Gusmao Iha Nia Rezidensia

Smnewstl Media online-Tersa feira ne’e maizumenus tuku 6 (nen) dadersan Membru Policia Unidade Corpo Seguransa Pesoal (CSP), ne’ebe fo protesaun ba Kay Rala Xanana Gusmao inklui komunidade no autorodade Suco Bidau Lecidere rasik hakfodak ho prezensa sidadaun lubun iha rezidensia Eis Presidente Republika nomos Primeiro Ministro ne’e nian.

Tuir informasaun jornalista SM-Newstl asesu komfirma katak, prezensa sidadaun hirak ne’e hodi husu apoio aihan maske sira konsiente katak, Xanana Gusmao hanesan sidadaun bai-bain.

“Ami mai desde tuku lima madrugada ne’e, ami mai tamba hahan memang laiha duni no ami rona, Avo Nana sempre ajuda rma hot-hotu, tamba nee mak ami mai. Maske atu hetan deit fos Saka ida ou Supermi kaixa ida deit mos, ami agradese,”haktuir Domingas sidadaun ida husi Taibesi.

Hare ba prezensa komunidade nian ne’e maske taka tia ona aviso iha Purtaun katak, laiha ona hahan, maibe ho fuan boot, Kay Rala Xanana Gusmao bolu nia seguransa sira hodi mobiliza fila fali sasan oituan nebe mak iha hodi oferese netik nunee sira la fila ho mamuk.

Sasan baziku nebe sei iha mak hanesan Fos sakas 40 no Supermi. Tamba ne’e ba ferik ho katuas sira, deside fo deit fos, enkuanto sira nebe sei iha forca simu deit Supermi.

Xefe Suco Bidau Lecidere, Luis R.S Pereira ne’ebe simu informasaun kona ba prezensa komunidade iha Xanana Gusmao nia rezidensia akompanha husi nia Xefe Aldeia to’o kedas iha fatin hodi observa.

Lider komunitaria ne’e informa katak, nia parte labele atu haruka komunidade sira ne’e fila tamba laiha autorizasaun.

“Ami rua Xefe Aldeia mai iha ne’e, maibe labele atu haruka sira fila tamba laiha autorizasaun. Ami so bele asegura deit oinsa karik sira hetan netik aihan ruma husi Avo Nana mos buat hotu bele lao ho diak hodi la hamosu engravamentu ou difikulta fali ema nia movimentu iha fatin ida ne’e,”nia relata.

Observasaun SMNews-tl nota katak, maske kada ema simu deit Fos saka ida no balun hetan deit Supermi, maibe nafatin agradese, tamba ne’e sira ida-idak fila.ho expresaun kontenti no disiplina.

Tuir informasaun katak, antes ne’e mos kada loron komunidade barak maka sempre hakbesik ba iha Rezidensia eis Lider Rezistensia ne’e nian hodi husu apoio aihan. (rio)