Komando Geral PNTL Fo Fiar Alex Samurai Lidera PNTL Esquadra Cristo Rei

Smnewstl.com 13-09-2021, (Dili)-Komando Geral Policia Nacional Timor Leste (PNTL) liderado Komandante Geral, Komisario Faustino da Costa fo fiar ba Inspector Alexandrino da Costa Samurai kuinesidu ‘Alex Samurai’ hodi lidera PNTL Eskuadra Cristo Rei subtitui Inspector Gaspar Ximenes.

Ba SMNews Alexandrino da Costa Samurai deklara, knar foun hanesan responsabilidade , tamba ne’e agradese ba komfiansa husi Komando Geral no sei asegura hodi servi povu no nasaun.

Hanesan mos jovens rezistensia, Alex Samurai konsidera hanesan orgulho ida ba nia hodi halao knar foun hanesan Comadante Esquadra nebe boot Liu iha Municipio Dili.

“Hau sente orgulho tanba responsablidade hodi controla ba area nebe boot liu. Ne’e tenke pasensia no responsablidade, importante mak oinsa halao ita nia serbisu hodi serbi ba Ita nia povo hodi asigura sira no proteje sira tuir papel no misaun PNTL,”tenik Alex

Nia hatutan, prezensa iha Esquadra Becora hodi hatutan deit servisu anterior nomos hare oinsa maka buka hadia diak liu tan.

“Apresia tebes hau nia komandante sesante nia servisu. Buat balun nebe dala ruma nia seidauk halo,, hau buka atu kompleta, tamba hanesan servidor estado no nasaun ita nunka mais kumpletu,”dehan Alex

Durante mandantu, Alex Samurai promete sei buka kria ligasaun diak ho autoridades lokal, Igreza, veteranos, juventude rezistensia, komunidades nomos entidades hotu hodi kontribui ba oaz no estabilidade iha rai laran li-liu Cristo Rei.

Alexandrino da Costa Samurai rasik ho nia esperensia servisu mak hanesan, komandante VIP internasional iha CSP tinan 3, Komandante Pelotao ba Gabinete eis Primeiro Ministro, Rui Maria de Araujo tinan 2, Komandante Korpo Diplomatico ba Embauxador hotu iha TL tinan 2, Kordenador Seguransa iha Parlamento Nacional tinan 3, sai Xefe treinamentu ba CSP tinan 2 inklui mos komandante pelotaun ba eis Presidente Republika, Taur Matan Ruak no ikus liu hetan fiar ba lidera PNTL Esquadra Becora. (Rio)