Koligasaun Partidu 4 Reafrma Apoiu Lori Xanana ba Troka Lu-Olo

Smnewstl.com 20-11-2021 (Dili) – Partidu Polítiku ha’at kompostu husi partidu Frente Mudansa, PLPA, PDP no APMT asina ona akta koligasaun no deklara apoiu bá Líder Karismátiku, Kay Rala Xanana Gusmão hodi kandidata a’an iha eleisaun Prezidente Repúblika periódu 2022-2027.

Porta-voz Koligasaun, Egídio de Jesus afirma, akta koligasaun ne’ebe partido ha’at asina maka atu lori fila Kay Rala Xanana Gusmao ba Aitarak Laran nune’e normaliza hikas situasaun rai laran nomos hamorin naran Timor Leste iha mundu internasional.

Egídio fundamenta sira nia razaun hodi dehan, hasoru ona ho Xanana Gusmao maibé, Xanana rasik mak seidauk deside tamba konsidera desizaun másimu sei foti liu husi komferénsia nasionál Partidu CNRT nian.

“Resposta ne’e ha’u labele fó sai, tanba Maun Boot rasik ami bá hasoru direta (4 mata) no katus mós mai iha ne’e, bá hasoru ofisialmente iha sede nasionál CNRT nian, resposta mak ne’e, Maun Boot atu avansa ga la’e, sei hein komferénsia nasionál CNRT nian, órgaun másimu mak kongressu partidu nian, espesialmente partidu CNRT nian,” dehan Porta-voz, Egídio de Jesus, Taibesi Liquintai, Dili, sábdu ne’e.

Porta-voz ne’e lori partidu ha’at nia naran, husu Líder Karismátiku, Kay Rala Xanana Gusmão, atu lalika tula liman tan bá kandidatu ruma tamba esperensia hatudu ona hanesan ne’ebe dadaun ne’e akontese.

“Ami reafirma pozisaun politika hakruk no husu bá Maun Boot Kay Rala Xanana Gusmao nu’udar Líder Karismátiku atu lalika tula liman no fó bensaun iha primeira ronde bá alin doben ruma, nune’e labele akontese tan hanesan agora hodi perturba dezenvolvementu nasaun,” dehan Egídio de Jesus.

Egídio de Jesus mós husu ba sidadaun hotu atu banati tuir espíritu demokrasia ne’ebé Líder Karismátiku, Kay Rala Xanana Gusmão halo, iha artigu 7 kona-ba sistema direitu no sufrájiu universál.

Maske seidauk serteza kona ba kandidatura Komandante Eim Xefe das Falintil, Kay Rala Xanana Gusmao, maibe koligasaun ne’ebe nia parte lidera hanesan porta voz nafatin esperansa ba konfrensia husi partido CNRT ba sira nia afirmasaun.

To’o oras ne’e, naran hirak ne’ebe hahu harame ona media social ba kandidatura Prezidente Republika periodo 2022-2027 mak hanesan Armanda Berta dos Santos atual Vise Primeira Ministra, Antonio Benevides atual Deputado Bankada PUDD, Virgilio Guterres Lamukan atual Prezidente Konsellu Imprensa, Eis Padre Martinho Gusmao no seluk tan.

Entretantu, Prezidente Republika, Francisco Guterres Lu-Olo seidauk dekreta kalendariu ba Eleisaun Prezidensial.  Tuir planu sei dektreta iha fulan Janeiru 2022.(ant)