KM Aprova Projetu Investimentu Pelican Paradise Group no Minuta Akórdu Espesiál Investimentu

Smnewstl.com 29-09-2021 (Dili) – Reuniaun konsellu ministru aprova ho alterasaun bá projetu rezolusaun governu kona-ba projetu investimentu Pelican Paradise Group no aprova mós minuta akórdu espesiál investimentu nian.

Proposta ne’e aprezenta husi Ministru Koordenadór Assuntus Ekonómikus (MKAE), Joaquim Amaral, ho mós Diretór ezekutivu Ajénsia Promosaun Investimentu no Exportasaun Timor-Leste, IP TradeInvest Timor-Leste, Arcanjo da Silva.

Minitru Prezidénsia Konsellu Ministru, Fidélis Manuel Leite Magalhães informa, konsellu ministru aprova ona projetu projetu investimentu Pelican Paradise Group no Minuta Akordu Espesiál Investimentu nian.

“Konsellu ministru aprova projetu investimentu ida husi Pelican Paradise Group no mós aprova sira-nia minuta akórdu espesiál investimentu. Projetu ne’e sei halo iha zona Tasi-tolu,” informa Ministru Fidélis Magalhães, hafoin remata konsellu ministru iha Palásiu Governu, Dili. Kuarta ohin.

Entretantu, projetu ne’e prevee investimentu ida ho dolár amerikanu milloins 700 atu dezenvolve komplexu turístiku ida, iha área ho luan 558 hektares, iha zona entre Tasi tolu no Tibar ne’ebé inklui unidade oteleira sira, kampo golfe ida.

Nune’e mós kompleta ho lote rezidensiál sira, sentru dezenvolvimentu ida ba jovens sira, eskola internasionál ida, ospitál internasionál ida no sentru komersiál sira.

Komplexu turístiku ne’e, iha nia faze kriasaun nian sei kria postu traballu besik 750 no postu traballu 1300 permanente hafoin finaliza nia konstrusaun.

Alem de ne’e, prevee mós katak, 80% husi área projetu nian sei hala’o reflorestasaun no restaurasaun ba flora no fauna.(ant)