KJP Arkidioseze Dili Estabelse Akordu ho World Vision, Proteje Direitu Labarik

Smnewstl.com Media Online — Komisaun Justisa no Páz (KJP) Arkidioseze Dili, asina Memorandu Entendimentu (MoU) ho World Vision Timor-Leste (WVTL) hodi implementa programa protesaun bá direitu labarik no mós selebrasaun família iha sosiedade.

Diretór Komisaun Justisa no Páz Arkidioseze Dili, Padre Demétrio da Conceição Xavier informa, durante ne’e komisaun justisa no páz implementa pakote programa dame nian iha sosiedade liu-liu iha área rurál, tanba haree bá área ne’ebé sempre mosu violénsia doméstika makas.

Nune’e, hafoin komisaun justisa no páz halo assesmentu bá suku ida iha postu administrativu Lekidoe munisípiu Aileu, hodi implementa programa dame nian, nune’e bele mentaliza ema no sosiedade atu evita konflitu violénsia iha família.

“Pakote ida-ne’e di’ak, husi World Vision mai ami aprezenta programa ne’e, sira halo aproximasaun ho ami husi komisaun justisa i páz Arkidioseze nian, hafoin ami komesa enkontru hodi ko’alia kona-ba programa ida-idak, ne’e mak ami tempu ida-ne’e ami foti programa rua, ida kona-ba protesaun labarik, ida fali kona-ba selebrasaun família,” dehan Diretór Komisaun Justisa no Páz, Padre Demétrio da Conceição Xavier, hafoin remata asinatura MoU iha salaun komferénsia episkopál lesidere, Dili. Segunda (26/07/21).

Padre Demétrio esplika, sosiedade atu armonia no laiha konflitu violénsia iha família laran, mak tenki kria páz iha uma laran, tanba sosiedade nia hun mak família.

“Ita-nia sosiedade ne’e nia hun mak família, bainhira nia hun ne’e di’ak, sosiedade mós di’ak, tanba dala barak família kuandu la di’ak, oinsá mak ita bele fó mós sosiedade ne’ebé di’ak,” dehan nia.

Kona-ba labarik nian, Padre Demétrio subliña, liu husi akórdu ne’e, tempu badak Komisaun Justisa no Páz ho WVTL sei bá fó formasaun bá ekipa, nune’e bele hahú nia implementasaun.

“Formasaun ne’e ami sei ko’alia kona-ba direitu labarik sira-nian, oinsá mak labarik sira tenki tratamentu husi uma laran husi inan-aman bá labarik sira oinsá. Hanesan nia tema dehan, protesaun labarik hanusa proteje labarik husi parte ne’ebé, ne’ebé husi lei, ekipa prepara tiha ona matéria atu tun bá baze,” tenik nia.

Diretór Komisaun Justisa no Páz ne’e rekoñese, durante ne’e ONG ho ajénsia barak mak hala’o ona servisu ne’e, liu-liu fó protesaun bá direitu kriansas nian iha Timor-Leste.

Maibé labarik sira iha área rurál balun, sira-nia seidauk asesu bá sira-nia direitu, tanba ne’e komisaun justisa no páz ho WVTL sei servisu hamutuk atu proteje sira.

Iha sorin seluk, Diretora Nasionál WVTL, Migena Shulla informa, World Vision hanesan organizasaun kristaun ne’ebé servisu hamutuk ho nasaun 100-resin iha mundu, tanba igreja hanesan parseiru estratéjiku World Vision nian.

Migena Shulla hatutan, World Vision hakarak servisu hamutuk ho igreja, tanba igreja mak servisu liu ho povu, no mós hatene nia povu nia preukupasaun sira.

“Kualkér fatin ne’ebé World Vision servisu bá, igreja mak nu’udar parseiru estratéjiku ne’ebé World Vision servisu hamutuk, tanba ami fi’ar katak, igreja servisu besik liu ho komunidade no sira hatene nia nesessidade, no igreja ejíste nanis tiha ona fatin sira-ne’e antes World Vision tama no igreja sei nafatin servisu ho komunidade sira bainhira World Vision remata ninia servisu,” dehan Migena Shulla.

Diretora WVTL ne’e dehan, nia vizita ona fatin barak iha Timor-Leste, no observa katak, ladún iha atendimentu báziku, tanba dalaruma fasilita saúde laiha, maibé igreja iha.

Tanba World Vision manifesta prontidaun atu servisu hamutuk ho komisaun justisa no páz, nune’e bele proteje labarik no kria selebrasaun di’ak ho família sira.

“Hanesan Diretór Komisaun Justisa no Páz hateten, ami sei servisu hamutuk par atu haree oinsá bele fó protesaun bá labarik sira, oinsá servisu hamutuk ho família sira, selebra hamutuk ho família sira,” tenki nia.

Ne’eduni nia hatutan, liu husi asinatura nota entendimentu ida-ne’e, hanesan prosesu ida atu formaliza komitmentu husi World Vision nian, sai parseiru ho igreja, nune’e World Vision bele fó apoiu téknika ho igreja hodi fó atendimentu bá komunidade.

Programa rua ne’e, WVTL no komisaun justisa no páz sei implementa iha postu administrativu Lekidoe ho Remexio munisípiu Aileu.(ant)