KJNT Deklara Apoio Antonio Benevides ba Aitarak Laran

Smnewstl.com (Dili) — Klibur Joventude Nasionalista Timorense (KJNT) deklara, fó apoiu tomak bá timoroan potensial atuál Deputadu Bancada-PUDD, António Benevides atu kandidata aan bá Prezidente Repúblika PR tinan 2022.

Presidente KJNT, Armindo Fernandes de Carvalho afirma, ejistensia KJNT atu reflete no esplora hodi halo análize bá dinámika situasun polítika atuál relativa ho eleisaun prezidensiál próximu ano no eleisaun parlamentar 2023.

“Ami hakarak deklara ba públiku ho firmeza no prontidaun tomak, atu kandidata ami-nia kandidatu independente maun Deputado Antonio De Sa Benevides ba Presidente da Repúblika periodo 2022-2027. KJNT mos pronto atu lori Maun deputado Benevides hodi kompete iha festa demokrasia 2022,” afirma Prezidente KJNT, Armindo Fernandes de Carvalho liu husi komferénsia imprensa ne’ebé hala’o, Domingu (08/08/21) ne’e iha Camea Becora, Dili.

Armindo sublinha, janesan foin-sa’e iha dever no obrigasaun atu kontinua estafeta hodi lidera nasaun no prezerva istória libertasaun nasionál Timor-Leste nian iha futuru. Tamba ne’e, KJNT ne’ebe estabelese ona iha fulan Setembru 2020, hodi kontribui ba transformasaun iha sosiadade no ekonomia.

“Bazeia bá análize KJNT, nasaun doben Timor Leste oras ne’e tama hela iha ambiguidade, degradasaun morál no krize de lideransa. Atu koresponde ba ejizensia sira-ne’e, presiza joventude ne’ebé mak iha esperiénsia, kualifikadu no valór ne’ebé mak di’ak, nune’e bele kapasita ita hodi partisipa loloos iha prosesu dezenvolvimentu iha futuru,” subliña prezidente KJNT.

“Desizaun ida-ne’e, ami foti ho análiza ne’ebé profunda no ho konsiensia tomak katak, maun Deputadu António De Sá Benevides iha duni kbi’it no kapasidade atu rezolve situasaun ne’ebé ami mensiona iha leten,” hatutan nia.

KJNT konsiente iha mundu globalizadu ohin loron nian, foin-sa’e sira hatene katak, iha oportunidade barak, maibé oportunidade sira-ne’e la to’o ba ema hotu.

Reprezentante foinsae profesional ne’e profunda liu tan, ezisténsia KJNT atu halibur jovertude hotu hodi bele hatutan, no haburas espíritu nasionalismu no patriotízmu bá jerasaun foun sira hodi kontribui ba dezenvolvimentu nasaun doben Timor Leste.

To’o informasaun ne’e fo sai, Antonio De Sa Benvides rasik seidauk deklara nia pozisaun ruma. (ant)