Kazu Eis Padre Dasbach : Ministerio Publiku Presindi Nia Testamunha 21, Diskumfia Deklarasaun la Suporta Akuzasaun

Smnewstl.com Media online -Tribunal Distrital Oecusse Segunda feira ne’e kontinua julga kazu Topu Honis, ne’ebe involve eis Padre Richard Dasbach.

Dasbach diskumfia halo abuzu sexual hasoru orfonatu sira iha Topu Honis nune’e Vaticano deside hodi demite ona nia husi Padre, maske prosesu judisial sei lao hela.

Julgamentu kontinuasaun ne’ebe tama ona ba faze rona deklarasaun testamunha ne’ebe aprezenta husi Ministerio Publiku hamutuk nain 21 ne’e hahu tuku sia dadersan no termina iha tuku hat lokoraik.

Maske nune’e remata julgamentu parte testamunha 21 aprezenta sira nia lamentavel hasoru Ministeriu Publiku, reprezenta Procurador Matias Soares tamba konsiderado la respeita sira nia direitu hodi fo deklarasaun bazeia ba notifikasaun.

“Ami mai iha ne’e bazeia ba notifikasaun Ministeriu Publiku, maibe to’o tia iha laran lakoi rona fali ami nia deklarasaun, la hatene tamba saida,”kestiona Ermelinda Elu.

Nia hatutan, sira nia parte preparadu no pronto fo sasin nune’e kazu ne’e bele prosesu lalais, maibe Ministeriu Publiku maka presindi ou lakoi rona fali sira nee maka hamosu duvidas.

Nune’e mos Pascoela Eco deklara, prezensa bazeia ba notifikasaun, maibe parte Ministeriu Publiku lakoi rona fali sira nia deklarasaun ne’e halo sira sente duvidas tebes.

“Ami nia deklarasaun eskrita hato’o tia ona, ohin ami husik hela atividade hotu hodi mai deit iha ne’e, mas Ministerio Publiku lakoi rona ami nee tamba saida. Keta tauk ami atu koalia lia los ruma karik dehan los deit,”nia preokupa.

Hafoin aprezenta tia pozisaun, sira deside hodi fila fali deit ba Orfonato Topu Honis no husu ba parte Ministeriu Publiku atu konsidera mos sira nia preokupasaun ligado ho notifikasaun ne’ebe simu.

Tuir informasaun ne’ebe SMNews asesu komfirma katak, julgamentu adia fali ba Kuarta feira semana ne’e ho agenda rona deklasaun testamunha, maibe laos ona sira nain 21. Signifika Ministeriu Publiku maka Presindi rasik testamunha 21 ne’ebe aprezenta. Ho razaun ne’e maka hamosu duvidas.

Maske nune’e prosesu hotu lao diak no hetan seguransa masimu husi PNTL.

Julgamentu ba kazu ne’e lidera husi Juiz Koletivu Yudit Pamukas, Hugo da Cruz Pui no Evangelino Belo.

Julgamentu kontinuasaun ne’e rasik marka prezensa mos Eis Padre Dasbach ho nia advogado reprezenta husi Miguel Faria, Marcelino Marques, Joao Ndun inkkui Eusebio Guterres no Pedro Aparico.

Aliende ne’e, iha julgamentu dadersan marka mos prezensa Lider Nacional Kay Rala Xanana Gusmao.

Prezensa Eis Lider Rezistensia ne’e hanesan reafirma ona antes katak, hakarak akompanha prosesu ne’e hodi hatur justis ho lolos.

Maske informasaun ne’e fo sai, maibe parte Ministeriu Publiku seidauk aprezenta pozisaun ruma ligado preokupasaun testamunha nain 21, ne’ebe nia parte aprezenta.

Tuir informasaun total testamunha hamutuk 30 resin, maibe aprezenta deit maka 21. (Rio)