Kazu Diskumfia Subar Amante Iha FFTL Rezolvidu, Francisco Jeronimo Foku ba Dezenvolve Futebol

Smnewstl.com 16-11-2021 (Dili) – Rezultadu husi enkontru Exco, deside mantein Francisco Jerónimo lidera Federasaun Futeból Timor-Leste (FFTL).

Enkontru Exco ne’e lidera husi Prezidente FFTL, Francisco Jerónimo rasik, ne’ebé kompostu husi membru sira mak hanesan, Vise Prezidente FFTL na’in-rua, reprezentante F-FDTL maka Vise Xefe Estadu Maiór Jenerál F-FDTL, Maijor Jenerál Falur Rate Laek, reprezentante husi Polísia Komandante Polísia Munisípiu Dili, Superintendente Xefe Henrique da Costa.

Reprezentante Parlamentu Nasionál mak Deputada bankada CNRT, Maria Terezinha Viegas, maibé la partisipa iha enkontru Exco ne’e.

Prezidente FFTL, Francisco Jerónimo hateten, enkontru Exco ne’e, la ko’alia kona-ba kazu ne’ebé diskonfia nia subar amante iha edifísiu FFTL, tanba ne’e, husi reuniaun ne’e rasik mos la hasai funsionáriu FFTL ida.

“Laiha espulsa tanba hanoin ohin ha’u dehan katak, hanesan família bola, iha problema tur hamutuk fó solusaun, solusaun ohin loos hotu ona, no hotu-hotu simu malu hanesan maun alin hanesan família bola, ami la ko’alia saida (kazu ne’ebé akontese iha FFTL), nem oituan mós laiha, hotu ona,” dehan Prezidente FFTL, Francisco Jerónimo, hafoin remata enkontru Exco iha FFTL, Dili, Tersa-feira ne’e.

Executivo ne’e komfirna, iha enkontru membru Exco afavór ho unanimidade bá servisu FFTL, tanba konsiderado6 servisu sira administrasaun FFTL nian durante ne’e la’o di’ak tebes.

“Reuniaun hanesan baibain kona-ba administrasaun servisu saida mak ami hala’o, buat sira-ne’ebé ami foti ho unánimu katak, la’o di’ak hotu, no familiár, tanba família bola labele, saida mak akontese laiha ninia efeitu ida, tanba ne’e mak ami foti desizaun,” informa Jerónimo.

Atuál Ministru Assuntu Parlamentar no Komunikasaun Sosiál (MAPKOMS) ne’e hatutan, buat ne’ebé akontese iha resintu FFTL la fó impaktu negativu bá servisu FFTL nian.

Kazu ne’e rasik akontese iha loron hirak liu ba no sai konsumu publiku hafoin media balun publiku.

Liu tia loron ida, Presidente Federasaun Futebol Timor Leste atual Membru Komite Central FRETILIN ne’e mos deside suspende kedas nia a’an nudar membru maske mantein nafatin pozisaun iha governo no federasaun rasik.(ant)