Kazu Detetadu Foun Covid-19 Hahú Menus, Rekoperadu Aumenta

Smnewstl.com 10-09-2021 (Dili) – Sala Situasaun Sentru Integradu Jestaun Krize (SIJK) rejista sesta-feira ohin, kazu foun detatadu bá Covid-19 hahú redúz no mós kazu rekoperadu barak liu kompara ho loron hirak liu bá.

Nune’e mós, númeru óbitu (mate) 0 (zero) no mós númeru ema ne’ebé hala’o tratamentu ospitalizadu redúz, kompara ho horiseik, liu-liu redusaun iha kazu moderadu.

Tanba ne’e, kazu detetatu foun ne’ebé relata ohin dia 10 de Setembru de 2021 hamutuk 92, no husi kazu kazu detetadu foun ne’e iha Dili 62, Bobonaro 9, Baucau 5 no munisipiu seluk hamutuk 16. Enkuantu kazu rekuperadu hamutuk 325, no óbitu ka mate laiha.

Husi total kazu detetadu foun ohin mane 36, no feto 56, maioria ho idade tinan 3 to’o tinan 60, no iha na’in 37 40,2% mak kazu sintomátiku ka hatudu sintomas. Enkuantu na’in 21 (23%) mak iha ona vasina kompletu no 7 (8%) hetan ona vasina doze dahuluk.

Alem de ne’e, total kazu ativu ohin, dia 10 de Setembru de 2021 hamutuk 3.295, ne’ebé dadauk ne’e halo hela tratamentu iha sala izolamentu ne’ebé governu prepara.

Total kazu konfirmadu kumulativu ne’ebé sura husi 21 fulan Marsu tinan 2020) to’o loron 10 fulan Setembru tinan 2021 hamutuk 18.308.

Husi horiseik mai ohin, hamutuk hotu Laboratóriu Nasionál Saúde halo teste PCR bá amóstra hamutuk 462 iha Dili, teste PCR refere husi vijilánsia sentinel 35, rastreiu ba kontaktu (Contact tracing) 70, rastreiu aleatóriu (Random Screening) 49, viajen sai husi serka sanitária Munisipiu Dili 129, viajen internasionál 2 no Follow up iha quarentena hamutuk 177.

Maibé total testes PCR ne’ebé halo horiseikiha Munisipiu sira seluk, REAOA no iha HNGV, hamutuk 321, Baucau:50, Ermera 24, Maliana 36, Maubisse 22, RAEOA 0, Suai 24, Viqueque 13, Lospalos 6 no) HNGV 146.(ant)