Kazu Covid-19 Aumenta, Posibilidade Sistema Saúde Kolapsu

Smnewstl.com 24-08-2021 (Dili) — Primeiru-Ministru (PM), Taur Matan Ruak deklara, posibilidade sistema saúde Timor-Leste nian kolapsu, tanba kada loron númeru kazu pozitivu Covid-19 aumenta bá beibeik.

Nune’e PM Taur dehan, nia haruka ona pedidu bá nia omólogu Primeiru-Ministru Austrália, Scott Morrison, hodi husu apoiu rekursu umanus no lojístika bá Timor-Leste.

“Segundu kombate Covid-19 no ita-nia sistema saúde, sinseramente ha’u bele hatete bá deputadu sira katak, ita iha rísku atu ita-nia sistema saúde ne’e kolapsu, ha’u horseik asina dokumentu ida husu pedidu bá Primeiru-Ministru Austrália par ajuda ita rekursu umanus no mós lojístika,” PM Taur Matan Ruak, hatete iha intervensaun iha plenária PN iha ámbitu debate pedidu renovasaun deklarasaun estadu emerjénsia bá dala-17, Tersa ohin.

Xefe Ezekutivu ne’e haktuir, antes ne’e husu ona governu Austrália harii laboratóriu nasionál ida no mós providensia aimoruk vasina mai Timor-Leste.

“Ha’u haruka ajuda harii ita-nia laboratóriu, abastese ita ho vasina, provavelmente ita presiza, tanba pur-ezemplu espesialista bá jere ventiladór ladún iha, ne’e rísku boot ida bá ita-nia sidadaun sira-ne’ebé bá iha ne’ebá,” PM afirma.

Primeiru-Ministru mós preukupa, tanba númeru kazu aumenta drástikamente, maibé oras ne’e dadauk rezerva kama hela 4 de’it, tanba ne’e labele ona atu uza bá pasiente ne’ebé karik deteta tan.

“Segundu númeru kazu ne’e aumenta drástikamente, ita iha rezervas kama ne’e kuaze 4 ga 5 de’it informasaun ne’ebé horseik (segunda) ha’u simu, ne’e signifika na’in 5 tan bá seluk ne’e ida-idak iha uma par tau oksijéniu karik ha’u lahatene, entaun ita iha rísku eminente loos,” dehan nia.

Nune’e mós, nia husu deputadu sira atu ajuda governu halo kampaña nasionál vasinasaun no mós medidas prevensaun Covid-19 bá populasaun sira, nune’e bele kontribui bá rísku kontájiu surtu Covid-19 iha Timor-Leste.(ant)