Kareta Prado PN Ne’ebé Sai Polémika Seidauk Entrega Bá Patrimóniu Estadu

Smnewstl.com 05-10-2021 (Dili) – Diresaun Jerál Jestaun Patrimóniu Estadu (DJJEP) Ministériu Finansas seidauk simu kareta prado 12 ne’ebé deputadu terseira lejislatura sira utiliza to’o agora seidauk entrega bá Parlamentu Nasionál (PN).

Diretór Jerál Jestaun Patrimóniu Estadu, Januário da Gama hateten, patrimóniu estadu simu ona viatura operasionál PN nian hamutuk 12, maibé veíkulu hirak ne’e la inklui kareta prado ne’ebé uluk deputadu sira uza no seidauk entrega bá PN.

Tanba kareta hirak ne’e, agora dadauk, iha hela jestaun patrimóniu Parlamentu Nasionál nian, tanba ne’e sira-nia kompeténsia atu jere viaturas refere.

“Konsentrasaun ne’ebé agora iha bá de’it kareta 18 unidades ne’ebé kareta operasionál Parlamentu Nasionál nian ne’ebé mak Ministériu Finansas rekolla mai hodi prepara bá leilaun, restu ne’e sei iha ámbitu kompeténsia jestaun Parlamentu Nasionál ninian,” dehan Diretór Jerál, Januário da Gama, iha nia knaar fatin patrimóniu estadu Balide, Dili. Tersa ohin.

Eis Diretór Jerál Finansas Estadu Ministériu Finansas ne’e afirma, kareta unidades 18 Parlamentu Nasionál nian ne’e, submete ona bá iha prosedimentu governu sentrál nian atu halo prosesu leilaun.

“(Prado) ne’e sei iha Parlamentu Nasionál, porque bainhira deklara ona mai iha Ministériu Finansas, ami bá halo verifikasaun hodi submete bá leilaun, portanto ami ko’alia ona kona-ba ami-nia kompeténsia. da-ne’ebé mak ami rekolla mai tiha ona, tanba ne’e halo ona deklarasaun mai katak, presiza halo leilaun, entaun Ministériu Finansas iha ona ninia kapasidade jestaun ida par atu prepara bá servisu alineasaun,” subliña nia.

Dadauk ne’e, diresaun jerál jestaun patrimóniu estadu, rejista viaturas estadu iha territóriu tomak hamutuk rihun 3.415, no husi númeru ne’e la inklui viaturas pezadus sira.

Nune’e, husi viaturas estadu unidade rihun 3.415 ne’e, sira-ne’ebé kondisaun sei di’ak hamutuk rihun 3.013 unidade, kondisaun aat hamutuk 402, enkuantu hirak ne’ebé prienxe ona rekizitus bá leilaun hamutuk 2.522

Maibé Komesa horseik (segunda, 05-10-21), Ministériu Finansas liu husi diresaun jerál patrimóniu estadu loke ona konkursu públiku bá públiku hodi halo leilaun bá viaturas hamutuk rihun 1.015, ho modalidade konkursu públiku no mós konkursu internu.

Leilaun refere bá dala-14 iha tinan 2021, iha ne’ebé kompostu husi kareta hamutuk 291, no mós motorizadas hamutuk unidades 457.(ant)