KAK-JSMP ‘Futu’ Lia Kombate Kriminalidade Korrupsaun Iha TL

Smnewestl.com (09-12-21) (Dili) — Komisaun Anti Korrupsaun (KAK) hamutuk ho sosiedade sivil Programa Monitorizasaun Sistema Judisiária (JSMP) asina akórdu kooperasaun servisu atu kombate kriminalidade korrupsaun iha Timor-Leste.

Akórdu ne’e KAK ho JSMP selebra iha ámbitu komemorasaun loron mundiál Anti Korrupsaun, ne’ebé hala’o iha salaun Laline Larigutu CNE, Dili, kinta ne’e.

Komisáriu KAK, Sérgio Hornai hateten, objetivu prinsipál husi asinatura akórdu entre KAK ho JSMP ne’e, atu haluha liután servisu iha instituisaun responsável rua ne’e, liu-liu haree bá iha kombate kriminalidade korrupsaun, tanba órgaun responsável rua ne’e mak reprezenta estadu ho Nasoens Unidas iha Timor-Leste.

“JSMP nia servisu balun halo mezmu nia natureza atu haree de’it bá krime gráve sira, nestemomentu halo servisu ida metin iha Tribunais sira, haree observasaun bá iha sistema judisiária sira-ne’ebé mak la’o, entaun KAK, JSMP futulia hamutuk hodi hanoin katak, importante ita bele reforsa tan ita-nia filleira sira iha medidas sira kombate kriminalidade korrupsaun nian,” dehan Komisáriu KAK, Sérgio Hornai.

Sérgio Hornai hatutan, KAK ho JSMP sempre servisu atu haree kona-ba julgamentu bá kazu sira iha Tribunál, no mós akompaña desizaun polítika bá aprovasaun lei sira-ne’e tuir duni interese povu nian.

“Sempre halo servisu hodi hametin parseria ho JSMP atu haree kona-ba prosesu sira julgamentu ne’ebé mak la’o iha Tribunál la’o to’o iha ne’ebé. Tanba ita ko’alia kona-ba enkuadramentu legál sira, liu husi lei sira ne’ebé mak ita atu halo, hira hotu bele halo ho finalidade ida tenki benefisia. Em primeiru lugar tenki tau interese povu nian, labele interese grupu ga interese individu nian iha ne’ebá,” subliña Sérgio Hornai.

Sorin seluk, Direta Ezekutiva JSMP, Ana Paula Marçal reforsa, nota entendimentu ne’e atu haree liu bá área prevensaun nian, tuir Lei Medidas Prevensaun no Kombate Korrupsaun (MPKK), nune’e JSMP bele servisu hamutuk ho KAK atu haree bá iha peskiza no monitorizasaun nian.

Ana Paula hatutan, durante ne’e JSMP mak halo monitorizasaun julgamentu bá kazu sira iha Tribunál, tan ne’e, liu husi akórdu ne’e, JSMP bele fornese dadus bá KAK atu bele halo investigasaun.

“Asina nota entendimentu ne’e atu haforsa tan ami-nia kooperasaun, ami mós bele KAK atu sira bele iha informasaun liután, tanba ami mak durante ne’e halo monitorizasaun iha Tribunál, par sira mós iha dadus ne’ebé ami iha, ne’e par bele ajuda sira bainhira halo investigasaun bá iha Ministériu Públiku depois to’o julgamentu iha Tribunál karik ita bele hetan desizaun ida-ne’ebé adekuadu,” dehan Ana Paula.

Alem de ne’e, liu husi akórdu ne’e, JSMP ho KAK sei fó formasaun konjuntu bá instituisaun públiku no privadu sira kona-ba prevensaun no kombate korrupsaun.

“Ami mós sei halo formasaun konjuntu liu-liu haree matéria sira-ne’e bá iha grupu sira-ne’ebé interesadu ka instituisaun sira-ne’ebé interesadu, tanba JSMP nia hakarak di’ak liu ita prevé kedas duké ita kura, importante atu kura, maibé ita miniza kedas iha área prevensaun nian atu ema hotu hatene,” subliña nia.

Entretantu, durasaun tempu bá implementasaun nota entendimentu entre JSMP ho KAK ne’e bá tinan 5, nune’e sensibiliza informasaun báziku kona-ba korrupsaun bá sidadaun sira atu bele hatene.(ant)