Juventude Lautém Deklara Apoiu Lere Bá PR

Smnewstl.com Media Online— Juventude munisípiu Lautém, deklara fó apoiu tomak bá atuál Xefe Estadu Maiór Jenerál FALINTIL Forsa Defeza Timor-Leste (F-FDTL) Tenente Jenerál Tito Cristovão da Costa ‘Lere Anan Timur atu kandidata aan bá Prezidente Repúblika periódu tinan 2022 to’o 2027.

Porta-voz Juventude Munisípiu Lautém, Julião Guimarães hateten, rajaun apoiu Lere Anan Timur atu kandidata aan bá Prezidente Repúblika, tanba Lere nu’udar maubere oan ne’ebé kompremetidu durante tinan 24 nia laran bá luta ukun rasik a’an.

“Ami juventude husi Munisípiu Lautém hato’o ami-nia apoiu tomak bá Tenente Jenerál Lere Anan Timur atu kandidata aan bá Prezidente Repúblika bá periódu tinan 2022 to’o tinan 2027. Tenente Jenerál Lere Anan Timur, maubere oan ne’ebé kompremetidu nia aan bá kauza ukun rasik aan durante tinan 24 hahú husi luta bá ukun rasik aan to’o ohin loron,” dehan porta-voz, Julião Guimarães, sesta (23/07/21) liu husi komferénsia imprensa, iha rezidénsia Pantai-kelapa, Dili.

Julião Guimarães hatutan, juventude Lautém oan sira inspiradu tebes apoiu Lere Anan Timur, tanba Tenente Jenerál hanesan komisáriu polítiku bá segundu jerasaun ne’ebé sei moris, no mós hatudu ona nia lideransa ne’ebé sempre tane aas liu interese estadu.

Nia hatutan, tempu to’o ona bá Tenente Jenerál Lere Anan Timur atu lidera Timor-Leste, hodi garante estabilidade governativa no dezenvolvimentu nasionál.

“Nia nu’udar komisáriu polítiku bá segundu jerasaun ne’ebé sei moris to’o ohin loron, ami juventude sente inspiradu ho Tenente Jenerál Lere Anan Timur nia lideransa ne’ebé nia hatudu durante ukun aan nia laran, nia sempre tane aas interese estadu liu interese grupu ka família sira, ami hanoin tempu to’o ona atu Tenente Jenerál Lere lidera rai ida-ne’e hodi garante estabilidade governativa ho dezenvolve rai ida-ne’e bá oin,” afirma nia.

Sorin seluk, Juventude Lautém oan, Ventura Pinto reforsa, deklarasaun fó apoiu bá Tenente Jenerál Lere Anan Timur ne’e sira-nia, sira seidauk konsulta ho Lere Anan Timur, tanba ne’e inisiativa raisk hanesan juventude Lautém oan.

“Ida-ne’e ami juventude distritu Lautém ho inisiativu atu kandidatu señór Lere Anan Timur bá Prezidente Repúblika bá periódu 2022 to’o 2027, nu’udar juventude Lautém ho hanoin ida katak, so Prezidente periódu 2022 to’o 2027, ha’u hanoin Jenerál Lere bele lori prosesu tomak ho di’ak bá dezenvolvimentu nasaun ida-ne’e,”.dehan Ventura.

Ventura Pinto afirma, juventude Lautém oan hakarak kandidatu bá Prezidente Repúblika ho independente no labele liu husi partidu polítiku ruma.

Maibé, la taka dalan mós bá partidu polítiku ne’ebé hakarak fó apoiu bá Lere nia kandidatura, tanba ne’e kompeténsia partidu polítiku sira.

“Tuir ami juventude nia hanoin katak, bá kandidatura ho independente di’ak liu, maibé karik iha apoiu deklarasaun polítika husi partidu seluk, depois ita-boot sira bele konfirma bá partidu sira, oinsá partidu sira-nia hanoin,” dehan Ventura.(ant)