Jornalista Senior Candido Alves ho Zezito Hetan Fiar Lidera TLPU, MAPKOMS Kongratula

Smnewstl.com 13-11-2021 (Dili) – Candido Alves ho Zezito da Silva ofisialmente eleitu nu’udar Prezidente no Sekretáriu Jerál hodi lidera asosiasaun Timor-Leste Press Union (TLPU) bá periódu tinan 4 husi tinan 2021 to’o 2025.

Estrutura foun ne’e kompostu husi Candido Alves Prezidente, Umbelina Amaral Vise Prezidente, Zezito da Silva Sekretáriu Jerál, Marcelino Bata Sekretáriu Jerál Adjuntu no Efigénia da Costa nu’udar tezoreira.

Candido Alves husi pakote B halakon pakote Jordão Henrique no Venidora de Oliveira ho votu 135 no 43.

Prezidente TLPU eleitu, Candido Alves komprometidu sei servisu hamutuk ho membru tomak atu tetu no tane liberdade iha anin, liberdade iha moris no liderdade iha fuan, nune’e fó benefísiu bá membru sira no mós bele dezenvolve di’ak liután asosiasaun bá oin.

“Ha’u mai lori programa tolu iha fatin ida-ne’e dalarua ona ha’u hamrik katak, ha’u mai ho liberdade iha anin, liberdade iha moris, liberdade mós iha fuan. Ha’u hakarak mak ne’e, ita hotu hamutuk hodi serví tane, tetu, nune’e bele garante anin liberdade ne’e bá ita-nia rain, bá ita hotu jornalista nian,” dehan Prezidente TLPU eleitu, Candido Alves, hafoin eleitu iha kongressu extra-ordináriu iha salaun Delta Nova, Dili, sábdu ne’e.

Candido Alves husi membru TLPU sira, atu tau ketak diverjénsia ne’ebé iha, no lolo liman bá malu, hodi serví no lori TLPU, tanba estrutura foun ne’e sei la halo diskriminasaun bá membru ida.

Nia hatutan, estrutura foun ne’e mós sei servisu hamutuk ho Ministériu Assuntu Parlamentar no Komunikasaun Sosiál (MAPKOMS), tanba MAPKOMS mak sempre tau matan no sai mahon bá jornalista sira.

“Na’i Ministru ne’ebé ka’er ukun no bandu iha rai ida-ne’e katak, durante ne’e ita mós tau matan bá ami, ha’u ka’er misaun ida-ne’e bá tinan ne’ebé naruk, ami sei servisu hamutuk mós ho na’i Ministru ho sira seluk, tanba Ministru ida mak ne’e, ita-nia rain ne’e tenki di’ak mós hanesan ema hotu nian ne’ebé ita hotu haree,” dehan nia.

Sorin seluk, Ministru Assuntu Parlamentar no Komunikasaun Sosiál (MAPKOMS), Francisco Jerónimo, kongratula estrutura eleitu sira, tanba iha prontidaun makas atu asume responsabilidade ida-ne’e.

MAPKOMS hatutan, kongressu extra-ordináriu ne’e akontese, tanba durante ne’e, TLPU laiha lideransa atu lidera asosiasaun refere.

Tan ne’e MAPKOMS mós fi’ar katak, estrutura TLPU lideradu Candido Alves ne’e, sei halo buat ruma hodi dezenvolve TLPU bá oin.

“Ha’u hakarak fó parabéns bá Señór Candido ne’ebé eleitu bá Prezidente TLPU no mós nia estrutura tomak, bá ita-boot sira-nia dedikasaun, ita-boot sira-nia prontidaun atu asume responsabilidade ida-ne’e hodi hala’o imi-nia knaar bá oin tinan 4, hein katak, ho ita-boot nia lideransa, ita-boot bele halo netik buat ruma tau hela bá iha TLPU, hatutan saida mak estrutura anteriór sira halo hela, hadi’a saida mak seidauk hadi’a di’ak,” dehan Ministru Jerónimo.

Sábdu ohin, asosiasaun jornalista TLPU, realiza kongressu extra-ordináriu hodi hili fali estrutura foun, tanba estrutura anteriór ne’ebé lidera husi Prezidente Manuel Pinto ho Sekretáriu Jerál Horácio Babo, deside rejigna aan ona.(ant)