Japaun Apoiu Vasina AstraZeneca Doze Rihun 168 Bá Timor-Leste

Smnewstl.com (Dili) — Governu Japaun fó apoiu aimoruk vasina AstraZeneca doze rihun 168 bá governu Timor-Leste.

Embaixadór Japaun iha Timor-Leste, Masami Kinefuchi hateten, sente onradu mak entrega aimoruk vasina AstraZeneca doze rihun 168 bá governu Timor-Leste ne’ebé simu husi Primeiru-Ministru, Taur Matan Ruak.

“Ha’u espesialmente sente honradu tebes hodi entrega vasina hirak ne’e ba Primeiru Ministru Taur Matan Ruak, hodi Primeiru Ministru Japaun, Suga no povu Japaun tomak nia naran. Sesta semana kotuk, vasina Astra-zeneca ne’ebé produs iha Japaun, ho montante doze168,000 to’o iha ne’e. Ida ne’e parte ida husi promesa ne’ebé ami nia Primeiru-Ministru hato’o iha Juñu, wainhira nia konvoka reuniaun Vasina COVAX hamutuk ho GAVI, iha Tóquio,” dehan Embaixadór Japaun Masami Kinefuchi iha diskursu hafoin entrega vasina bá Xefe Governu, iha MNEK Pantai-kelapa Dili. Segunda (16/08/21).

Diplomata Japaun ne’e afirma, sira hasoru difikuldade boot bainhira atu transporta vasina AstraZeneca mai Timor-Leste, tanba kestaun konektividade.

“Dezafiu ida ne’ebé ami hasoru mak difikuldade atu lori vasina hirak ne’e mai to’o Timor-Leste, tanba kestaun konektividade ka problema transporte. Maibe, finalmente COVAX konkorda hodi aranza voo fretadu ida uza doasaun boot Japaun nian ba Fasilidade COVAX ho montante billiaun $1, no ohin loron ita hotu iha ne’e. Ha’u agradese tebes ba COVAX, UNICEF no Governu Timor-Leste ba sira hotu nia apoia hodi realiza serimónia entrega vasina,” dehan nia.

Sorin seluk, Primeiru-Ministru (PM), Taur Matan Ruak, agradese bá governu no povu Japaun ne’ebé fó apoiu ona aimorkl vasina mai Timor-Leste.

“Tanba ne’e señór Embaixadór, ha’u hakarak lori ha’u-nia naran rasik lori povu Timór nia naran agradese ita-boot nia esforsu tomak no liu husi ita-boot agradese señór Primeiru-Ministru Japaun no Japaun bá jenerozidade ne’ebé fó kontribuisaun ho vasina para bele salva vida iha ami-nia rain,” dehan PM Taur.

Ho apoiu sira-ne’e Xefe Governu fi’ar katak, sei iha serteza, to’o fim do ano 2021, maski vasina la atinji to’o 100%, maibé pelu menus atinji 80% populasaun hetan vasinasaun par ké bele ajuda Timór fila-fali bá normalidade.

“Ha’u hakarak aproveita iha oportunidade ida-ne’e agradese bá profisionais saúde liu-liu Dili nian ne’ebé lidera husi doutora Agostinha (Segurado) ne’ebé halo servisu di’ak loos fó ezemplu bá munisípiu sira hotu-hotu, forma di’ak atu evita Covid-19 alastra mak avansa ho vasina makas,” dehan nia.

PM Taur hato’o agradesimentu espesiál bá organizasaun mundiál saúde ho UNICEF ne’ebé halo esforsu ho difikuldade boot mais lori vasina ne’e to’o iha Timór.\

To’o ohin doasaun governu no povu Japaun nian, Timor-Leste simu ona 982.380 vasinas, iha númeru ida-ne’e, covax fó 1.800, Nova Zelándia 24 mill, Xina 100 mill, Austrália 577.580, Portugál 12 mill no Japaun 168 mill.

Husi númeru ida-ne’e, Timór konsege vasina sidadaun iha Timór laran tomak ne’ebé ohin atinji primeira doze iha 45,2%, no segunda doze 127,1779 koresponde 16,9%.

Prosesu vasinasaun iha Dili, atinji 70,7% primeira doze no segunda doze 49,1%, tuir fali munisípiu Covalima 54,9% no Vikeke 54,3%.(ant)