Ismael: Fator 3 Kontribui Makas Bá Dezastre Naturais

Smnewestl.com 13-12-21 (Dili) — Diretór Jerál Protesuan Sivíl, Superintendente Ismael Babo hateten, fator tolu mak kontribui makas liu bá akontesimentu dezastre naturais.

“Dezastre ruma akontese ne’e iha fatores tolu de’it, fator ida mak dezastre ne’e por natureza, dezastre ida por umanus no dezastre seluk mak ita bele dehan katak, akontesimentu tuir ita-nia konsiénsia rasik, husi fatores tolu ne’e mak kontribui bá dezastre naturais,” dehan Superintendente Ismael Babo, iha knár fatin Kaikoli, Dili, Segunda ne’e.

Ismael Babo hatutan, durante ne’e dezastre naturais akontese barak liu iha kapitál Dili, tanba kreximentu populasaun iha Munisípiu Dili kontinua sa’e bá beibeik.

Alem de ne’e, nia konsidera, sidade Dili klot, maibé jestaun nafatin sai preukupasaun bá Protesaun Sivíl, tanba lixu ladún apropriadu, no mós komunidade sira laiha konsiénsia hodi so’e fo’er arbiru.

“Entaun kuandu dezenvolvimentu la’o presiza fatuk, presiza rai-henek, presiza aí par halo uma, halo ponte, halo estrada kontribui bá dezastre, no mós konsiénsia populasaun nian rasik mak tesi-aí, fa’an aí, sunu rai arbiru nia impaktu mak ne’e. Depois ho jestaun lixu iha kapitál Dili mós ladún apropriadu ema so’e lixu arbiru,” afirma nia.

Nune’e, Ismael Babo apela nafatin bá populasaun sira ne’ebé kontinua hela iha fatin rísku bá dezastre hanesan, mota laran, mota ninin, foho lolon no seluk, bainhira udan liu ona minutu 30 bá leten, husu atu asegura aan ho dokumentu importante sira bá fatin seguru.

Alem de ne’e, Protesaun Sivíl mós fó alerta bá komunidade sira liu husi servisu hamutuk ho operadór telekomunikasaun sira, atu hato’o mensajen bá populasaun ne’ebé hela iha área rísku dezastre atu matan moris neon-na’in nafatin, bainhira udan monu rai.

Nune’e, evita atu labele akontese hanesan dezastre naturais iha dia 4 Abríl foin lalais ne’e, iha ne’ebé ema na’in 42 mak lakon vida inklui sasán infraestrutura barak hetan estragus.(ant)