Intervensaun Governo Tarde, Komunidade Palistla Foti Inistiva Ke’e Estrada ho Distansia Kilometru 2 Resin

SMNewstl.com 26-08-2021 (Dili)– Xefí aldeia Palistla, Posto Administrativo Maubara, Municipio Liquica Faustino dos Santos haktuir, razaun kominidade hola inistiva hodi ke’e rasik Estrada husi Kaikasa B ba tó sede aldeia Palistla, Suku Gugluer, ho distansia kilometru rua resin.

“Inisiativa mai husi komunidade rasik, tanba sente katak, ukun a’an kleur ona , maibé infraestrutura bazíka seidauk to’o iha sira nia helik fatin”.

“Ami ho hanoin ida katak, di’ak liu ita kee rasik de’it ona, duké hein governu. Ita hatama proposta tinan barak ona, maibe hela deit iha gaveta. Diak liu organiza malu servisu.

Ita ke’e kuaze fulan rua resin ona konsege fasilita movimentu komunidade la’o ain ho motorizada,”tenik lider komunitaria ne’e.

Nia hatutan, servisu ne’ebe halao fulan rua ona, maibé fasilita de’it movimentu ba ema lao ain ho motorizada.

Komunidade nia forsa só kee de’it ba motor mak bele liu no uza hodi lao ain ba merkadu inklui inklui ba escola.

Material ne’ebe uja ba servisu ne’e mak aisuak, karau dikur, kanuru rai, katana, no mareta.

Enkuanto kona-bá hahan komunidade rasik mak tau hamutuk no hetan apoiu husi funsionariu sira husi aldeia Palistla nian, balun fó osan, foos, mina, supermi, inklui nessesidade seluk neebé bele ajuda ba servisu umanitariu ne’e.

“Komunidade aldeia Palistla iha produtu hanesan, nuu, hudi, kami, maibé estrada la iha, no mós distansia ba merkadu dok susar ba komunidade sira atu bele lori sira nia produtu nee ba merkadu hodi bele hetan osan husi produtu hirak ne’e atu sustenta moris”, Nia lamenta.

Aldeia refere ho nia total populasaun hamutuk 363, mane 178 feto 185. (Rio)