Halao Serimonia Agradesimentu Hafoin Sae Sinto, PNTL Kaer Membru GAM 117 Iha Manleuana

Smnewstl.com 08-09-2021 (Dili) — Ekipa Konjunta kaptura Membru Grupu arte Marisias (GAM) husi Persaudaraan Setia Hati Terate (PSHT) hamutuk 117 ne’ebé halo hela sermonia agradesementu iha aldeia Mundu Perdidu, suku Manleuana, postu administrativu Don Aleixo, munisipiu Dili Tersa horseik mais ou menus tuku 02:00 madrugada.

Hafoin kaptura ekipa konjunta ne’ebé kompostu husi Servisu Informasaun Polisia (SIP), Servisu Informasaun Militar (SIM), no forsa rezerva lori kedas membru hirak ne’e bá iha komandu PNTL munisípiu Dili hodi halo prosesu identifikasaun.

Husi na’in 117 ne’e, mane 93, feto 24, inklui labarik ki’ik ida iha hela Komandu PNTL munisipiu Dili, tanba ekipa hosi PNTL sei halo hela prosesu identifikasaun hosi membru sira ne’e.

Hafoin halo identifikasaun membru hirak ne’e sei intrega kedan ba iha parte Sentru Integradu Jestaun Krize (SIJK) hodi submete kedan ba teste swab ne’ebe prepara ona iha Komandu PNTL munisipiu Dili.

PNTL kaptura membru GAM na’in 115 ne’e, tanba viola regra estadu emerjénsia no konfinamentu obrigatóriu, iha ne’ebé bandu halibur malu, maibé sira halibur.malu fali hodi realiza serimónia agradesimentu ne’ebé halibur ema barak.

Iha identifikasaun ne’e, polísia prende mós evidénsia balun hanesan, atributu farda hosi GAM, inklui motorizada ne’ebé asegura hela iha Komandu PNTL munisipiu Dili.

To’o notísia ne’e publika, Komandu PNTL munisipiu Dili seidauk aprezenta pozisaun ruma.(ant)