Hahú Ohin Bá Oin, PNTL Hahú ‘Aperta’ Populasaun Munisípiu Dili

Smnewstl.com 27-08-2021 (Dili) — Hahú ohin dia 27 fulan Agostu tinan 2021, Polísia Nasionál Timor-Leste (PNTL) liu husi Komandu Polísia Munisípiu Dili, hahú ‘aperta’ populasaun sira, nune’e bele kumpre rezolusaun governu kona-ba konfinamentu domisiliáriu jerál.

Iha sesta ohin, ekipa konjunta husi Komandu Munisípiu Dili kompostu husi polísia tránzitu, forsa rezerva, polísia komunitária inklui polísia eskuádra sira, halo ona sosializasaun dekretu governu bá loja sira, no mós populasaun sira ne’ebé hela iha Dili hodi bele komprende kona-ba rezolusaun governu n°.115/2021 dia 26 de Agostu impoin konfinamentu obrigatóriu jerál bá populasaun munisípiu Dili.

Medidas sosializasaun ne’e, ekipa konjunta hahú husi supermerkadu Balide, Bairru-Pite, Hudi-Laran, Delta, obralan Aimutin, rotunda Elemloi, obralan ponte komoro tres, Tasi-tolu no finál iha pontu estrada Tasi-tolu entre Dili no Tibar munisípiu Likisá.

Komandante Polísia Munisípiu Dili, Superintendente Xefe Henrique da Costa informa, orienta ona membru sira atu tun bá terenu sosializa dekretu governu bá loja na’in no mós komunidade sira iha kapitál Dili, nune’e sira bele komprende no halo tuir regras ne’ebé iha.

“Horseik sei iha hela faze ita fó hanoin, atu nune’e sira hodi kumpre, mais ohin uza ona forsa par hatete bá sira obriga sira hodi taka, karik sira la taka mak ita sei bolu lori mai edifísiu atu nune’e halo prosesu,” Superintendente Xefe Henrique da Costa informa bá jornalista iha knár fatin Kaikoli sesta ohin, hafoin halo operasaun.

Henrique da Costa hateten, PNTL kontinua implementa tuir rezolusaun governu nian, nune’e ema hotu-hotu tenki hela hakmatek iha uma, maibé bá sira-ne’ebé bele sai, kuandu iha servisu essensiál, atende xamada husi justisa no seluk tan.

“Ita nafatin implementa tuir rezolusaun governu nian katak, hotu-hotu tenki hakmatek iha uma, ne’ebé mak sai bá intensaun saida.? Iha ne’ebá temi ona katak, balun ne’ebé mak bá ospitál bá sosa aimoruk, sira-ne’e mak fó prioridade par halo movimentu, maibé hotu-hotu tenki hakmatek iha uma,” dehan nia.

Maske nune’e, Superintendente Xefe ne’e esplika, iha rezolusaun governu ne’e mós abranje bá sidadaun sira-ne’ebé kompleta ona vasina dalaruma atu hela hakmatek iha, no labele halo movimentu.

“Bá munisípiu halo saida.? Iha ne’ebá hatete ona katak, hotu-hotu tenki hakmatek iha uma, exetu bá sira-ne’ebé mak balun bá atende servisu essensiál ruma, atende xamada husi justisa tribunál nian, balun dalaruma sosa hahán, ida-ne’e mak bele autoriza hodi liu,” subliña nia.

Bá sira-ne’ebé atu halo viajen esepsionál bá munisípiu hanesan atu bá lia mate no seluk tan, maske kompleta ona vasina dalarua.

Henrique afirma, viajen esepsionál ne’e la temi iha rezolusaun governu, maibé bele bá trata dokumentu guia da marsa iha Sentru Integradu Jestaun Krize (SIJK) hodi bele hetan autorizasaun hafoin halo viajen.(ant)