Governu Reativa Fali Operasauun Transporte Públiku Bis, Mikrolete No Táxi, Bandu Ema Atu Labele Rabat Malu

Smnewstl.com 09-09-2021 (Dili) – Governu liu husi Ministériu Transporte Komunikasaun (MTK) deside reativa fali operasaun transporte públiku bis, mikrolete no taxi sira ne’ebé sei hahú iha loron 10 fulan Setembru tinan 2021.

Director Jerál MTK, Gaspar de Araújo hateten, bazeia bá desizaun husi konsellu ministu iha loron 8 fulan Setembru 2021, ne’ebé hakotu konfinamentu obrigatóriu iha munisípiu Dili no munisípiu balun iha territóriu tomak, tanba ne’e governu reativa fali operasaun transporte públiku husi Dili bá munisípiu.

“Nune’e MTK hamutuk ho PNTL hakarak apela bá públiku kona-ba ativasaun transporte terrestre nian, hahú loron aban dia 10 de Setembru MTK reativa fali transporte públiku sira ne’ebé bele sirkulasaun lívremente iha Dili laran, no mós husi Dili bá munisípiu no minisípiu mai Dili,” dehan Diretór Jerál, Gaspar de Araújo iha komferénsia imprensa ne’ebé hala’o iha salaun MTK eis Merkadu Lama, kinta ohin.

Embora governu reativa fali ona sirkulasaun transporte públiku, maibé husu kondutór ho ajudante no mós pasajeiru siratenki kumpre regras prokotolu saúde nian ne’ebé fó sai ona.

No MTK mós servisu hamutuk ho Polísia Nasionál Timor-Leste (PNTL), sei halo pasa revista pontu entrada sira, hodi observa pasajeirus sira-ne’ebé mak viola regras saúde, inklui la lori kartaun vasinasaun nian.

“Regras primeiru ema ne’ebé lori kareta ka ajudante no pasajeirus sira tenki lori kartaun kinu ne’ebé vasina kompletu ona dalarua, regras segundu ema hirak ne’ebé opera no utiliza trasnporte públiku, la’o lori tutuir kartaun kinur. Terseira atu kumpre protokolu OMS Covid-19 nian obrigatóriu tenki uza máskara, tenki distansia sosiál no mós antes atu sa’e kareta tenki uza hand sanitizer par hamoos liman, karik iha bee bele fase tiha liman,” dehan nia.

Operasaun ne’e, bá dei’it transporte públiiku ne’ebé mak hetan ona lisensa husi Diresaun Nasionál Transporte Terrestre (DNTT), no mós motorísta sira bainhira atu halo movimentu tenki lori ho dokumentu kareta nian.

Sorin sorin, Komandate Xefe SeksaunTrábzitu Nasionál, Inocencio da Costa Freitas hatete, PNTL kordena ho Sala Situasaun Sentru Integradu Jestaun Krize (SIJK), atu bele haree sansaun ne’ebé aplika bá hirak ne’ebé mak viola regras protokolu saúde nian, no mós transporte nian nian.

“Tanba ami kopera hamutuk fila-fali ho MTK atu verifika dokumentus, ami-nian sei haree liu bá kareta, sei servisu hamutuk fila-fali atu bele haree atendimentu kona-ba kartaun kinur laiha oin seluk fila-fali, tanba ami sei hato’o fali bá sira-ne’ebé kompetente atu bele haree fali ida-ne’e,” dehan Komandante Xefe Seksaun Tránzitu Nasioná, Inocencio.

Inocencio afirma, lei autoriza ema ne’ebé vasina kompletu ona bele halo movimentu, enkuantu sira-ne’ebé seidauk vasina labele halo movimentu, nune’e evita rísku kontájiu surtu Covid-19 bá ema seluk.(ajo)