Governu Propoin Bá PR Lúolo Renova Tan Estadu Emerjénsia

Smnewstl.com 20-10-2021 (Dili) – Konsellu minitru delibera no propoin bá Prezidente Repúblika (PR), Françisco Guterres ‘Lúolo’ atu renova estadu emerjénsia loron 30 tan hahú husi oras tuku 00:00 loron 30 fulan-outubru tinan 2021 to’o tuku 23:59 loron 28 fulan-novembru tinan 2021.

Desizaun ne’e konsellu ministru foti, hafoin rona tiha aprezentasaun husi Koordenadór Sala Situasaun Sentru Integradu Jestaun Krize (SIJK) kona-ba pontu situasaun epidemiolójika nasionál Covid-19 iha Timmor-Leste.

“Depois de rona konsellu ministru deside atu renova estadu emerjénsia bá loron 30, ne’ebé iha fulan Novembru EE sei kontinua, maibé medidas ezekusaun mak governu sei ajusta ho situasaun iha ita-nia rai laran,” informa Ministru Prezidénsia Konsellu Ministru, Fidélis Manuel Leite Magalhães, hafoin remata enkontru konsellu ministru iha Palásiu Governu, Dili. Kuarta ne’e.

Fidélis hatutan, dalan ne’ebé di’ak liu maka númeru vasina tenki aumenta, tanba númeru persentajen vasina agora dadauk seidauk atinji meta ne’ebé governu prevé ona, ne’e bele garante normalizasaun.

Tan ne’e, husu sidadaun sira atu simu vasina, tanba agora hahú tama ona iha tempu finadu no mós selebrasaun sira seluk iha fulan novembru ho dezembru inklui natál no tinan foun.

“Tanba ne’e mak husu bá inan-aman sira lalika lakon tempu, sé ita hakarak situasaun ne’e normaliza iha loron boot hirak ne’ebé sei tuir mai, importante teb-tebes atu ita-boot sira bá vasina, tanba rezultadu pozitivu ne’ebé ita rezulta agora ne’e mós rezulta husi medidas hirak ne’ebé governu inklui konfinamentu ne’ebé halo tiha no mós distansiamentu,” afirma nia.

Governante ne’e esplika, vasina hanesan dalan ne’ebé di’ak liu atu bele hasa’e imunidade ema-nian hodi prevene aan husi propagasaun vrisu Covid-19.

Ne’eduni ho renovasaun estadu emerjénsia bá dala-19 ne’e, bainhira hetan ona aprovasaun husi Parlamentu Nasionál, mak governu aprova medidas ezekusaun bá deklarasaun estadu emerjénsia refere, ne’ebé sei ajusta tuir situasaun atuál.

Entretantu, ho renovasaun estadu emerjénsia ne’e, permite suspensaun ka restrisaun bá direitu no garantia fundamental balun, nune’e bele evita no neutraliza risku propagasaun husi variante foun SARS-CoV-2, nune’e bele proteje saúde públika inklui kapasidade resposta husi sistema nasionál saúde.(ant)