Governu Propoin Bá PR Lúolo Extende Estadu Emerjénsia Bá Dala-18

Smnewstl.com 22-09-2021 (Dili) – Iha reuniaun konsellu ministru kuarta-feira ohin, hafoin halo análize bá aprezentasaun kona-ba pontu situasaun epidemiolójika nasionál, deside propoin bá Prezidente Repúblika (PR), Francisco Guterres ‘Lúolo’ atu renova estadu emerjénsia bá dala-18.

Tuir komunikadu imprensa ne’ebé Smnewstl.com asesu husi Prezidénsia Konsellu Ministru katak, pontu situasaun epidemiolójika nasaun nian ne’ebé aprezenta iha reuniaun konsellu ministru ne’e, husi Koordenadór sira Sala Situasaun Sentru Integradu Jestaun Krize (SIJK) nian.

Nune’e, VIII governu konstituisionál, deside propoin Prezidente Repúblika, Francisco Guterres Lú Olo, renovasaun ba estadu emerjénsia nian, ba loron 30 tan.

Renovasaun bá deklarasaun estadu bá dala-18 ne’e ho hanoin katak, kauza determinante sira ne’ebé justifika ona deklarasaun estadu emerjénsia no ninia renovasaun sira kontinua mantein, no atu bele evita no neutraliza risku propagasaun sira husi variante foun SARS-CoV-2, nune’e bele proteje saúde públika no kapasidade resposta husi Sistema Nasionál Saúde nian.

Governu propoin Xefe Estadu ho renovasaun estadu emerjénsia nian, ho permisaun bá suspensaun ka restrisaun bá direitu no garantia fundamentál sidadaun sira-nian.

Alemde ne’e, konsellu ministru mós aprova projetu rezolusaun governu nian ne’ebé mantein impozisaun serka sanitária iha munisípiu Dili to’o tuku 23:59 loron 29 fulan-setembru tinan 2021.

Nune’e, mantein impozisaun proibisaun sirkulasaun ema sira-nian entre munisípiu Dili no sirkunskrisaun administrativa sira-seluk, exetu iha kazu hirak ne’ebé iha fundamentu forte tanba razaun seguransa públika, saúde públika, asisténsia umanitária, manutensaun ba sistema abastesimentu públiku ka razaun seluk ne’ebé presiza atu hala’o ba interese públiku nian.

Maibé la inklui iha proibisaun ba sirkulasaun ida-ne’e indivíduu sira ne’ebé komprova vasinasaun kompleta (doze rua) kontra COVID-19, no mós ba labarik sira ho idade tinan 6 ne’ebé akompaña ema sira ne’e.

Iha parte seluk, governu mós deside hakotu impozisaun serka sanitária iha munisípiu Baukau, Ermera no Kovalima, ne’ebé remata ohin iha tuku 23:59.(ant)