Governu Nomeia Guilhermina Lidera Munisípiu Dili

Smnewstl.com — Governu liu husi reuniaun konsellu ministru, nomeia Guilhermina Filomena Saldanha bá kargu Prezidente Autoridade Munisípiu Dili ho mandatu tinan lima hahú husi data ne’ebé simu posse.

Projetu rezolusaun governu bá nomeasaun ne’e aprezenta husi Ministru Administrasaun Estatal (MAE), Miguel Perreira de Carvalho, iha reuniaun konsellu ministru, kuarta (28/07/21) iha Palásiu Governu.

“Konsellu ministru aprova mós projetu rezolusaun governu nian ne’ebé proposta ida-ne’e mai husi señór Ministru Estatal hato’o bá konsellu ministru bazeia bá prosesu hotu ne’ebé Estatal halo, no propoin kandidatu ne’ebé mellór klasifikadu ho performa di’ak liu atu bele sai hanesan Prezidente Autoridade Munisípiu Dili, figura refere mak señóra Guilhermina Filomena Saldanha,” dehan Ministru Fidélis Magalhães, hafoin remata enkontru.

Konsellu ministru Guilhermina Filomena Saldanha bá kargu Prezidente Autoridade Munisípiu Dili, tanba haree bá klasifikasaun valór no performa ne’ebé di’ak.

“Ninia nomeasaun husi Estatal hetan aprovasaun husi konsellu ministru, konsellu ministru ohin halo rezolusaun ida bá ninia (Guilhermina) nomeasaun ne’e,” tenik Fidélis.

Entretantu, dadauk ne’e, atuál Prezidente Autoridade Munisípiu Dili maka, Gaspar Soares.(ant)