Governu Mantein Salario ’13’ Bá Funsionáriu Públiku, Seidauk Hanoin Halo Mudansa ba Lei

Smnewstl.com 25-11-2021 (Dili) – Primeiru-Ministru (PM), Taur Matan Ruak konfirma, oitavu governu konstitusionál seidauk iha hanoin atu halo alterasaun bá dekretu-lei kona-ba saláriu désimu terseiru ‘gaji 13’ bá funsionáriu públiku iha Dezembru kada tinan.

Iha reuniaun Konsellu Ministru kuarta (24/11/21), aprova ona dekretu-lei ne’ebé aprezenta husi Ministru Finansas, Rui Augusto Gomes dehan, pagamentu estraordináriu husi saláriu adisionál fulan ida bá funsionáriu ajente no kontratadu administrasaun públika, exetu funsionáriu estrajeiru sira.

Xefe Governu hateten, pagamentu estraordináriu bá saláriu désimu terseiru ka gaji 13 ne’e sempre halo kada tinan tuir lei ne’ebé iha, tanba seidauk iha mudansa ruma bá lei refere.

“Prosesu désimu terseiru més ne’e tinan-tinan, ami seidauk halo mudansa ida, kontinua de’it buat ne’ebé la’o ona iha tinan sira anteriór, ida-ne’e halo na baze bá lei ida-ne’ebé ita iha,” dehan PM Taur, hafoin remata enkontru semanal ho Xefe Estadu, Francisco Guterres Lú Olo iha Palásiu Prezidensiál Aitarak-laran, Dili, kinta ne’e.

PM Taur afirma, atu halo alterasaun bá dekretu-lei, bainhira iha situasuan extra-ordináriu ruma ne’ebé ejize atu altera lei ne’e.

“Emprinsípiu ita-nia prátika ida-ne’e tinan barak ona, seidauk bele hanoin par halo alterasoens, mais karik iha aban bairua situasaun extreme ida mak obriga halo alterasoens ne’e talves iha futuru mak ita sei ko’alia, mais por enkuantu seidauk,” tenik nia.

Entretantu, saláriu désimu terseiru ka gaji 13 ne’e, sei abranje de’it bá funsionáriu no ajente sira hotu iha administrasaun públika, enkuantu funsionáriu kontratadu estrajeiru sei la hetan gaji 13 ne’e.(ant)