Governu Mantein Pozisaun Vasina Dalarua Mós Tenki Hela Iha Uma

Smnewstl.com, 04-09-21 (Dili) — Oitavu governu konstitusionál kontinua defende ninia pozisaun katak, sidadaun ne’ebé mak kompleta ona vasina dalarua, nafatin submete bá teste swab no mós kumpre nafatin konfinamentu obrigatóriu hela iha uma.

Ministru Prezidénsia Konsellu Ministru, Fidelis Leite Magalhães klarifika, antes ne’e, governu deklara ona katak, ema ne’ebé mak kompleta ona vasina doze rua, bele la’o lívre iha territóriu laran tomak, no la sujeita bá konfinamentu obrigatóriu.

Maibé, haree bá evolusaun surtu covid-19 iha Timor-Leste ne’ebé hetok aat bá beibeik, inklui variante Delta ne’ebé ejiste ona iha Timor-Leste, mak liu husi rekomendasaun Sala Situasaun Sentru Integradu Jestaun krize (SIJK), Organizasaun Mundiál Saúde (OMS).

Nune’e, governu tenki toma medidias ne’ebé drástika hodi implementa hikas konfinamentu obrigatóriu iha munisípiu Dili, tanba ho intensaun hakarak salva povu nia moris.

“Tanba sá mak governu antes ne’e dehan ona katak, hirak ne’ebé vasina dalarua sei sirkula lívre, maibé foin lalais ne’e, iha loron 25 fulan Agostu, governu impoin regra ida bá ema hotu-hotu inklui mós sira ne’ebé vasina tiha ona dalarua tenki kumpre regra bá konfinamentu obrigatóriu, tanba desizaun ida-ne’e halo objetivu mak atu salva ita-nia sidadaun ninia vida,” dehan Ministru Fidelis Sábdu ohin, iha ministériu finansas.

Maski Primeiru-Ministru, Taur Matan Ruak, la partisipa iha reuniaun konsellu ministru iha loron 25 fulan Agostu foin lalais ne’e, maibé Xefe Governu informadu no aseita ho desizaun ne’ebé konsellu ministru foti, relasiona ho konfinamentu domisiliáriu iha Dili.

“Iha 25 fulan Agostu, maske ita-nia primeiru-ministru aujente iha reuniaun konsellu ministru, maibé Xefe Governu informadu no konkorda akompaña deliberasaun hotu konsidera rískus hirak ne’ebé mak iha, governu tenki hola duni desizaun radikal impoin konfinamentu bá sidadaun hotu independente vasina dalarua tiha ona ou vasina tiha ona ka la’e,” tenik nia.

Fatin hanesan, Ministra Saúde, Odete Maria Freitas Belo hateten, pessoál súde sira nafatin servisu hamutuk ho Polísia Nasionál Timor-Leste (PNTL), no mós autoridade lokál sira hodi fahe informasaun bá populasaun sira kona-ba importánsia husi vasina.

Tanba Ministra Saúde observa katak, to’o oras ne’e, populasaun barak mak seidauk komprende didi’ak kona-ba vantajen husi vasina refere, tanba tuir dadus estatístika Ministériu Saúde nian hatudu, taxa partisipasaun sidadaun nian atu simu vasina sei menus.

“Ita nafatin fahe informasaun husi vasina ninia vantajen saida, ami-nia pessoál saúde sira servisu ho membru PNTL, líder komunitária sira, atu hatutan hikas bá ita-nia komunidade, bá sira-nia suku, aldeia katak, ita iha programa vasinasaun ne’ebé mak ita iha obrigasaun atu simu vasina. Ho vasina ne’ebé mak la’o, estatístamente ami haree katak, partisipasaun komunidade nian bá vasina ne’e menus teb-tebes, dehan Ministra Saúde, Odete Belo.

Ho númeru vasina ne’ebé sei menus, maka governu buka meius hotu hodi bele konvense sidadaun sira atu simu vasina liu husi programa sorteiu vasinasaun, bainhira hetan efeitu husi vasina, mak kada ema sei hetan osan dálar $ 1000 to’o $ 10.000.

Maski nune’e, Odete Belo hatutan, nia rasik mak husu atu aplika fali konfiinamentu obrigatóriu iha munisípiu Dili, iha ne’ebé kazu pozitivu aumenta kada loron, tanba ne’e fasilidade saúde hanesan kama no seluk tan la asufisiente ona atu responde, inklui pessoál saúde barak mós infetadu bá Covid-19.

“Bá ami Ministériu Saúde, membru governu hotu-hotu ami iha diferensias ideias, ha’u hanesan Ministra Saúde toma pozisaun katak, ha’u hakarak atu aplika konfinamentu obrigatóriu, haree bá situasaun ami-nian katak, kama laiha, pessoál saúde mós komesa moras, sé mak atu toma atensaun bá ida-ne’e, entaun ha’u obriga atu tau konfinamentu obrigatóriu,”

Tanba ne’e, Ministra Saúde, Odete Belo dehan, haree bá evolusaun surtu Covid-19 iha Timor-Leste, posibilidade sei propoin tan bá konsellu ministru atu extende tan konfiinamentu obrigatóriu bá semana-rua, nune’e bele hakotu lalais konrente transmisaun lokál iha Timor-Leste.(ant)