Governu La Husu Ona PR Extende Estadu Emerjénsia

Smnewstl.com 24-11-2021 (Dili) – Ministru Prezidénsia Konsellu Ministru, Fidélis Magalhães hateten, governu sei la hato’o tan pedidu bá Prezidente Repúblika hodi husu atu Extende tan estadu emerjénsia, tanba Xefe Estadu promulga ona alterasaun dahuluk lei n°.10/2004 kona-ba lei sistema saúde.

Ministru Fidélis esplika, lei sistema nasionál saúde ne’e mak sei troka fali lei estadu emerjénsia ne’ebé kada fulan governu husu PR no autorizasaun husi Parlamentu Nasionál.

Maibé governante ne’e afirma, maski estadu emerjénsia la extende ona, la signfika moras Covid-19 hotu ona, tanba la’ós estadu emerjénsia mak determina moras Covid-19 ne’e.

“Ida la propoin ona renovasaun estadu emerjénsia, ne’ebé sei termina iha loron 28 fulan Novembru agora. Ho ida-ne’e, estadu emerjénsia la renova ona, maibé ho ida-ne’e la dehan katak, moras ne’e laiha ona, moras sei iha, sei konstitui ameasa ida, tanba ne’e mak sei husu nafatin bá maske laiha ona estadu emerjénsia, ita agora uza mak lei sistema saúde sai guiaun bá ita-nia atuasaun sira,” dehan Ministru Fidélis Magalhães, hafoin remata reuniaun konsellu ministru iha Palásiu Governu, kuarta ohin.

Iha artigu 3 husi lei sistema saúde ne’e mós sei vigora iha periódu loron 120 nia laran.

Tan ne’e, ho kriasaun lei sistema nasionál saúde ne’e, fó biban bá ezekutivu aprova ona dekretu-lei kona-ba medidas esessionál temporária vizilansia sanitária Covid-19 nian.

“Lei ne’e mós fó dalan bá governu par atu regula medidas hirak ne’ebé mak lei permite iha situasaun esessionál ida-ne’e, permite atu governu bele foti medidas sira, tanba ne’e, konsellu ministru hafoin deside laiha ona estadu emerjénsia, governu halo aprovasaun bá dekretu-lei kona-ba medidas esessionál temporária vizilansia sanitária nian ne’ebé resposta bá pandemia Covid-19,” dehan nia.

Nia hatutan, lei sistema saúde ne’e mós la fó dalan bá governu atu aprova regra konfinamentu obrigatóriu no serka sanitária, tanba autoriza de’it ezekutivu atu halo atuasaun nesessária hanesan uza máskara, distansia sosiál no seluk tan.

Inklui regula atividade merkadoria, suspende atividade sira seluk hanesan, atividade relijioza, sosiál, halo jestaun bá fronteira inklui pontu entrada no seluk tan.

Entretantu, estadu emerjénsia atuál sei remata iha loron 28 Novembru iha tuku 11:59.(ant)