Governu Konklui Ona Pagamentu Cesta Bázika, Reklamante rihun 26 To’o Agora Seidauk Simu

Smnewstl.com 28-09-2021 (Dili) – Maske antes ne’e, ministériu finansas hasai komunikadu imprensa katak, konklui ona pagamentu Cesta Básica ho montante millaun $63,5 bá kompaña fornesedór hamutuk 188 ne’ebé mak estabelese ona kontratu ho governu.

Maibé, Deputada bankada CNRT, Maria Fernanda Lay hateten, to’o agora reklamante hamutuk rihun 26 mak seidauk simu pakote ai-han cesta bázika, husi governu maske implementasaun estadu emerjénsia to’o dala-18 ona.

Deputada bankada CNRT ne’e dehan, iha extensaun estadu emerjénsia bá dala-18, serka sanitaria no konfinamentu obrigatóriu, governu hala’o tiha ona atu prevene ninia mitigasaun Covid-19, maibé laiha medidas konkretu ligadu go objetivu ezekutivu nian.

“Por-ezemplu cesta bázika, iha momentu serka sanitaria ho konfinamentu obrigatóriu par fó ai-han bá populasaun, miabé to’o ohin rekalante rihun 26 seidauk simu, ha’u lahatene durante ne’e populasaun reklamante sira-ne’e moris hanusa,” lamenta Deputada, Fernanda Lay iha intervensaun, iha ámbitu debate renovasaun estadu emerjénsia bá dala-18 iha Parlamentu Nasionál (PN), Tersa ohin.

Depuatada CNRT ne’e hatutan, to’o oras ne’e, sira seidauk hatene finalidade husi progressu pagamentu subsísiu uma dólar $ 200 bá uma ka’in sira.

“$ 200 dólars ne’e mós nia finalidade ne’e nusa ita lahatene, dehan hadi’a ekonomia, mais hadi’a to’o ne’ebé ita lahatene,” kestiona nia.

Entretantu, antes ne’e, Ministériu Finansas to’o iha loron 9 fulan setembru tinan 2021, konklui ona pagamentu Cesta Básica ho montante millaun $63,5 bá kompaña fornesedór hamutuk 188 ne’ebé mak estabelese ona kontratu ho Ministériu Implementadór sira.

Pagamentu hirak ne’e realiza hafoin Sekretariadu Tékniku Fundu Covid-19, Ministériu Finansas simu pedidu pagamentu husi Ministériu Turizmu, Komérsiu no Indústria hamutuk millaun $29,5 ba kompaña lokál 72.

Sekretáriu Estadu Kooperativa ho valór millaun $20,2 ba kompaña 24, Sentru Lojístika Nasionál ho valór millaun $8,4 ba kompaña 61 no Ministériu Agrikultura no Peskas ho valór millaun $5,2 ba kompaña lokál hamutuk 31.

Tanba kompaña fornesedór hirak ne’e mós kumpre ona sira nia devér hodi selu impostu rendimentu 0,5% husi sira nia totál pagamentu ba Autoridade Tributária, Ministériu Finansas ho totál kontribuisaun impostu hamutuk $317,5 mil.(ant)